అప్పన్నపేట పాఠశాలకు 50 బెంచీల వితరణ.

సూర్య - పెద్దపల్లి రూరల్:
పెద్దపల్లి మండలం అప్పన్నపేట జడ్పీ ఉన్నత పాఠశాలకు ఎంకే ఫౌండేషన్ ఆధ్వర్యంలో 50 బెంచీలను వితరణ చేశారు. ఫౌండేషన్ వ్యవస్థాపకుడు, ఎమ్మెల్సీ మల్క కొమరయ్య వీటిని సమకూర్చారు. విద్యార్థులకు కూర్చునేందుకు సరైన సౌకర్యం లేదని తెలుసుకుని బెంచీలు అందించినట్లు తెలిపారు. ఈ సందర్భంగా కొమరయ్య మాట్లాడుతూ.. తాను పదో తరగతి వరకు ఇదే పాఠశాలలో చదువుకున్నానని, బంధంపల్లి నుంచి ఐదు కిలోమీటర్లు నడిచి వచ్చి విద్యాభ్యాసం చేశానని గుర్తుచేసుకున్నారు. తనకు విద్యాబుద్ధులు నేర్పిన పాఠశాల అభివృద్ధికి సహకరించడం బాధ్యతగా భావిస్తున్నానన్నారు. గతంలో పాఠశాలకు ఆర్చ్, గేటు కూడా అందించినట్లు తెలిపారు. బెంచీల వితరణపై పాఠశాల యాజమాన్యం, ఉపాధ్యాయులు, గ్రామస్థులు ఎంకే ఫౌండేషన్‌కు కృతజ్ఞతలు తెలిపారు.