వైసీపీ ఐదేళ్ల కంటే ఈ రెండేళ్లలోనే పదింతల రోడ్ల నిర్మాణం
సూర్య ఆంధ్రప్రదేశ్ డెస్క్: గత వైఎస్సార్సీపీ ఐదేళ్ల పాలనతో పోలిస్తే కూటమి ప్రభుత్వం అధికారంలోకి వచ్చిన ఈ రెండేళ్ల కాలంలోనే పదింతల మేర గ్రామీణ రోడ్ల నిర్మాణాన్ని పూర్తి చేసి సరికొత్త రికార్డు సృష్టించిందని అధికార వర్గాలు వెల్లడించాయి. గత ప్రభుత్వ హయాంలో గుంతలమయంగా మారిన గ్రామీణ రహదారులను పునరుద్ధరించడంతో పాటు ప్రతి పల్లెలోనూ అంతర్గత సిమెంట్ రహదారులను యుద్ధప్రాతిపదికన నిర్మించామని స్పష్టం చేశాయి. కనీస మౌలిక వసతులు లేక అంధకారంలో మగ్గిన పల్లెలను నేడు ప్రగతి పథంలో పరుగులు తీయిస్తూ గ్రామ స్వరాజ్య లక్ష్యాన్ని సాకారం చేస్తున్నట్లు ప్రభుత్వం పేర్కొంది.
గ్రామీణాభివృద్ధే పరమావధిగా చేపట్టిన పల్లె పండుగ మొదటి మరియు రెండో విడతల ద్వారా ఏకంగా తొమ్మిది వేల కోట్ల రూపాయల విలువైన అభివృద్ధి పనులను దిగ్విజయంగా పూర్తి చేసినట్లు పాలనా వర్గాలు వివరించాయి. పాడి పరిశ్రమను ప్రోత్సహించి రైతులకు అదనపు ఆదాయం కల్పించే లక్ష్యంతో గత పాలన కంటే వంద రెట్లు ఎక్కువగా మినీ గోకులాల నిర్మాణాన్ని చేపట్టి రికార్డు నమోదు చేశామని తెలిపాయి. వ్యవసాయం, ఉద్యానవన పంటల విస్తరణతో పాటు ఉపాధి హామీ అనుసంధానంతో పల్లెల్లో శాశ్వత ప్రాతిపదికన మౌలిక ఆస్తులను సృష్టించినట్లు నివేదికలు స్పష్టం చేస్తున్నాయి.
గత ప్రభుత్వ హయాంలో కనీసం వీధుల్లో బ్లీచింగ్ పౌడర్ కూడా చల్లలేని దుర్భర స్థితిలో కొట్టుమిట్టాడిన గ్రామ పంచాయతీలను నేడు అత్యున్నత స్థాయికి తీర్చిదిద్దామని ప్రభుత్వం స్పష్టం చేసింది. ఆర్థిక సంఘం నిధులను సకాలంలో విడుదల చేసి, ఆర్థిక పరిపుష్టిని చేకూర్చడంతో నేడు స్థానిక సంస్థలు తమ గ్రామ అవసరాలకు అనుగుణంగా సొంతంగా అభివృద్ధి ప్రణాళికలు రూపొందించుకునే స్వయం ప్రతిపత్తి స్థాయికి ఎదిగాయని అధికారులు వివరించారు. పారదర్శక పాలన, స్థానిక ప్రజాప్రతినిధుల సమన్వయంతో గ్రామ పంచాయతీలను స్వయం సమృద్ధి కేంద్రాలుగా నిలబెట్టడమే లక్ష్యంగా అడుగులు వేస్తున్నామని పాలకవర్గాలు వెల్లడించాయి.
