వైద్య సేవలు

అర్నబ్‌ తుపాను నేపథ్యంలో ప్రజలకు సత్వర వైద్య సేవలు అందించేందుకు అన్ని ముందస్తు ఏర్పాట్లు చేసినట్లు వైద్య, ఆరోగ్య శాఖ మంత్రి సత్యకుమార్‌ యాదవ్‌ తెలిపారు. వైద్యులు, పారామెడికల్‌ సిబ్బంది సెలవులను రద్దు చేసినట్లు వెల్లడించారు. రాష్ట్రవ్యాప్తంగా 8,441 అత్యవసర పడకలు, 1,050 వైద్య బృందాలను సిద్ధం చేసినట్లు పేర్కొన్నారు. రాష్ట్రంలోని 1,892 ప్రభుత్వ అంబులెన్సులు, 367 ప్రైవేటు అంబులెన్సులను కలిపి మొత్తం 2,259 వాహనాలను రియల్‌ టైమ్‌ గవర్నెన్స్‌ సిస్టమ్‌ (ఆర్టీజీఎస్‌)తో అనుసంధానించారు. అవసరమైన ప్రాంతాలకు అంబులెన్సులను వెంటనే పంపించేలా చర్యలు చేపట్టారు. పాముకాటు చికిత్స కోసం 26,500 విరుగుడు ఇంజెక్షన్లతో పాటు అత్యవసర మందులను అందుబాటులో ఉంచారు. తుపాను ప్రభావం అధికంగా ఉండే 20 జిల్లాల్లోని 96 మండలాల పరిధిలో ఉన్న 1,176 ప్రభుత్వ ఆసుపత్రులపై ప్రత్యేక దృష్టి సారించారు. వర్షాలు, గాలుల తీవ్రతపై హెచ్చరికల నేపథ్యంలో శ్రీకాకుళం నుంచి బాపట్ల వరకు 20 జిల్లాల్లోని 255 మండలాల వైద్య సిబ్బందిని అప్రమత్తం చేశారు. 38 సహాయక శిబిరాల్లో వైద్య సేవలు అందించేందుకు ఏర్పాట్లు చేశారు. ప్రసవ తేదీ దగ్గర్లో ఉన్న 2,838 మంది గర్భిణులను ముందస్తుగా సమీప ప్రభుత్వ ఆసుపత్రులకు తరలించారు. విద్యుత్తు అంతరాయం ఏర్పడితే వైద్య సేవలకు ఆటంకం కలగకుండా జనరేటర్లు, ఇంధనాన్ని సిద్ధం చేశారు. తుపాను అనంతరం అంటువ్యాధులు ప్రబలకుండా పారిశుద్ధ్యం, తాగునీటి నాణ్యత పరీక్షలు, అవసరమైన మందుల సరఫరాపై ప్రత్యేక కార్యాచరణ రూపొందించారు. తుపాను సన్నద్ధతపై మంగళవారం సాయంత్రం ఉన్నతాధికారులతో నిర్వహించిన సమీక్షలో మంత్రి సత్యకుమార్‌ యాదవ్‌ మాట్లాడుతూ, ఇతర ప్రభుత్వ శాఖలతో సమన్వయం చేసుకుంటూ ప్రజారోగ్య పరిరక్షణకు ప్రాధాన్యం ఇవ్వాలని అధికారులను ఆదేశించారు. ఆర్టీజీఎస్‌ కమాండ్‌ కంట్రోల్‌ కేంద్రంలో అధికారులు, వైద్యులు 24 గంటలూ అందుబాటులో ఉంటారని అధికారులు మంత్రికి వివరించారు.

ఎం.గణేశ్, స్టేట్ బ్యూరో ఇన్ చార్జి