ప్రజలు తుఫాన్ పట్లు అప్రమత్తంగా ఉండాలి

నేటి దినపత్రిక సూర్య బ్యూరో రాజమహేంద్రవరంబంగాళాఖాతంలో ఏర్పడిన అర్నబ్ తుఫాన్ ప్రభావం ఎక్కువగా ఉన్నందున మండపేట నియోజకవర్గ ప్రజలందరూ అత్యంత అప్రమత్తంగా  ఉండాలని రాష్ట్ర అంచనాల కమిటీ చైర్మన్, ఎమ్మెల్యే వేగుళ్ళ జోగేశ్వరరావు తీవ్ర హెచ్చరిక చేశారు. రాబోయే రెండు రోజుల పాటు వాతావరణంలో ప్రతికూల మార్పులు చోటుచేసుకుంటాయని, భారీ వర్షాలతో పాటు బలమైన ఈదురుగాలులు వీచే అవకాశం ఉందని వాతావరణ శాఖ అధికారులు ధ్రువీకరించిన నేపథ్యంలో ఆయన ప్రజలకు పలు ముఖ్యమైన సూచనలు చేశారు. భారీ ఈదురుగాలులు, వర్షాల వల్ల చెట్లు, విద్యుత్ స్తంభాలు కూలే ప్రమాదం ఉంది. కావున ప్రజలెవరూ అనవసరంగా బయటకు రాకూడదు. ముఖ్యంగా చిన్నపిల్లలు, వయోవృద్ధులు ఇళ్లలోనే సురక్షితంగా ఉండాలి. తుఫాన్ సమయంలో విద్యుత్ సరఫరాకు అంతరాయం ఏర్పడే అవకాశం ఉన్నందున, తాగునీటి కొరత రాకుండా ముందస్తుగానే తగినంత మంచినీటిని నిల్వ చేసుకోవాలి. ఈ రెండు రోజులు పొలాల్లోకి వెళ్లడం ప్రమాదకరం. ఈదురుగాలులు, మెరుపుల ధాటికి ఎలాంటి జరగరాని ప్రమాదాలు జరగకుండా రైతులు, వ్యవసాయ కార్మికులు పొలాల వద్దకు వెళ్లకుండా ఇళ్లలోనే సురక్షితంగా ఉండాలి. నియోజకవర్గంలో ఎలాంటి అత్యవసర పరిస్థితి ఎదురైనా ఎదుర్కొనేందుకు మండల స్థాయి అధికారులు, రెవెన్యూ, పంచాయతీరాజ్, విద్యుత్ శాఖ సిబ్బంది పూర్తి స్థాయిలో సిద్ధంగా ఉండాలని ఎమ్మెల్యే ఆదేశించారు. లోతట్టు, బలహీనమైన ఇళ్లలో నివాసముంటున్న ప్రజల కోసం నియోజకవర్గ వ్యాప్తంగా ముందస్తుగా పునరావాస కేంద్రాలను సిద్ధం చేయడం జరిగింది. లోతట్టు ప్రాంత ప్రజలు ఏమాత్రం ఆలస్యం చేయకుండా, అధికారుల సహకారంతో సురక్షితంగా పునరావాస కేంద్రాలకు చేరుకోవాలని ఎమ్మెల్యే విజ్ఞప్తి చేశారు. అక్కడ ప్రజలకు భోజన వసతి, సురక్షిత తాగునీరు మరియు వైద్య సదుపాయాలు కల్పించేలా అధికారులను ఆదేశించారు. తుఫాన్ వేళ ప్రజలకు ఏ క్షణంలోనైనా తక్షణ సహాయం అందించడానికి నియోజకవర్గంలో మండలం/టౌన్ వారీగా ప్రత్యేక కంట్రోల్ రూమ్‌లను ఏర్పాటు చేయడం జరిగింది. ఏ చిన్న అత్యవసర పరిస్థితి ఎదురైనా మండపేట టౌన్: 08855-233002, మండపేట మండలం: 8919752684, రాయవరం మండలం: 9618006344, కపిలేశ్వరపురం మండలం: 08855-225457 ఈ నెంబర్లలో సంప్రదించాలని ఎమ్మెల్యే కోరారు.