తుఫాన్‌కు కూలిన చెట్టు తొలగింపు

బాడంగి, సూర్య : అర్నాబ్ తుఫాన్ ప్రభావంతో కురిసిన ఈదురుగాలులకు ఎరుకులపాకల గ్రామంలోని ప్రధాన రహదారి పక్కన ఉన్న తురాయి చెట్టు కూలిపోయింది. రామభద్రపురం నుంచి రాజాం వెళ్లే ప్రధాన రహదారిపై బుధవారం రాత్రి ఈ ఘటన చోటుచేసుకుంది. దీంతో రాకపోకలకు అంతరాయం ఏర్పడే పరిస్థితి నెలకొంది. విషయాన్ని గుర్తించిన బాడంగి మండల మాజీ ఉపాధ్యక్షుడు, ఏపీ ఎరుకుల సేవా సంఘం జిల్లా అధ్యక్షుడు, తెలుగుదేశం పార్టీ రాష్ట్ర ఎస్టీ సెల్ ప్రధాన కార్యదర్శి పాలవలస గౌరు ఆధ్వర్యంలో గ్రామ యువత, స్థానిక ప్రజలు గురువారం ఉదయం రంగంలోకి దిగారు. రచ్చబండ సమీపంలో రోడ్డుపై అడ్డంగా పడిన  చెట్టును తొలగించి, రాకపోకలకు మార్గం సుగమం చేశారు. సమయస్ఫూర్తితో స్పందించి ప్రజలకు ఇబ్బందులు కలగకుండా చర్యలు చేపట్టిన పాలవలస గౌరు, గ్రామ యువత, స్థానిక ప్రజలను పలువురు అభినందించారు.