తెలుగు భాషా వికాసంలో చైతన్యరాజుకు జీవిత సాఫల్య పురస్కారం..
అమలాపురం, మేజర్ న్యూస్ :వైద్య, విద్యా,సామాజిక సేవా రంగాలతోపాటు తెలుగు భాషా వికాసానికి విశేష సేవలందిస్తున్న గోదావరి గ్లోబల్‌ యూనివర్సిటీ కులపతి, కిమ్స్‌ వైద్య కళాశాల అధినేత, చైతన్య గ్రూప్‌ ఫౌండర్‌ అండ్‌ చైర్మన్ కె.వి.వి. సత్యనారాయణరాజు చైతన్యరాజుకు అమెరికాలోని డల్లాస్‌ అడాప్ట్‌ ఏ విలేజ్‌ గ్లోబల్‌ ఫౌండేషన్‌ ప్రతిష్ఠాత్మక జీవిత సాఫల్య పురస్కారాన్ని ప్రకటించింది.
వైద్య విద్యాభివృద్ధి, ప్రజారోగ్య పరిరక్షణ, గ్రామీణ ప్రాంతాల్లో సేవా కార్యక్రమాల నిర్వహణలో చైతన్యరాజు అందిస్తున్న సేవలను గుర్తిస్తూ ఈ పురస్కారాన్ని ప్రకటించినట్లు సంస్థ ప్రతినిధులు వెల్లడించారు. మూడు ప్రపంచ తెలుగు మహాసభలను నిర్వహించి తెలుగు భాషా వైభవాన్ని ప్రపంచానికి చాటడంలో ఆయన కీలక పాత్ర పోషించారు. కోవిడ్‌ సమయంలో ప్రజలకు ఉచిత వైద్య సేవలు అందించడంతోపాటు, ఉచిత వైద్య శిబిరాలు నిర్వహిస్తూ పేద ప్రజలకు అండగా నిలిచారు. పరిశుభ్రత, పర్యావరణ పరిరక్షణపై అవగాహన కల్పిస్తూ గ్రామాలను దత్తత తీసుకుని వాటి అభివృద్ధికి కృషి చేస్తున్నారు.
పూర్వ శాసనమండలి సభ్యుడిగా, ప్రభుత్వ విప్‌గా, ఈబీసీ కార్పొరేషన్‌ చైర్మన్‌గా కూడా ఆయన వివిధ బాధ్యతలు నిర్వహించారు. వైద్య, విద్యా, భాషా, సామాజిక రంగాల్లో ఆయన చేపడుతున్న కార్యక్రమాలు పలువురికి స్ఫూర్తిగా నిలుస్తున్నాయి.తనకు ప్రతిష్ఠాత్మక జీవిత సాఫల్య పురస్కారాన్ని ప్రకటించిన అడాప్ట్‌ ఏ విలేజ్‌ గ్లోబల్‌ ఫౌండేషన్‌ కమిటీ సభ్యులకు, భూపతిరాజు పండిత్‌కు చైతన్యరాజు కృతజ్ఞతలు తెలిపారు.
