తక్కువ ధరకే ప్రజలకు నాణ్యమైన ధరణి బియ్యం : 26 కిలోల బస్తా రూ.1,300లు : మదనపల్లి రైతుబజారులో సరఫరా

మదనపల్లె టౌన్,మేజర్ న్యూస్ : రోజురోజుకు ఆకాశాన్నంటుతున్న బియ్యం ధరలతో సామాన్యులకు ఉపశమనం కల్పించేందుకు ప్రభుత్వం ధరణి బియ్యాన్ని అందుబాటులోకి తీసుకొచ్చింది.పౌరసరఫరాల శాఖ నుంచి నాణ్యమైన సన్నరకం ధరణి బియ్యం కిలో రూ.50 రూపాయలు చొప్పున 26 కిలోల బస్తాలను రూ.1,300లకే అందిస్తున్నారు.మదనపల్లె పట్టణంలోని స్థానిక రైతు బజారులో ఈ బియ్యం సరఫరా చేస్తున్నట్లు నిర్వాహకులు క్రాంతి,వెంకటేష్ తెలిపారు.ఈ సందర్భంగా వారు మాట్లాడుతూ రేషన్ కార్డు లేదా ఆధార్ కార్డులో ఏదో ఒకటి రైతుబజారుకు తీసుకెళితే 26 కిలోల ప్యాకెట్ ను ఇస్తున్నట్లు తెలిపారు.ప్రస్తుతం రైతు బజారులో బియ్యం స్టాకు అవసరమైన మేర ఉందన్నారు.నాణ్యమైన సన్నరకం బియ్యాన్ని ప్రభుత్వం నిర్ణయించిన ధరకే విక్రయిస్తున్నట్లు తెలిపారు.అక్టోబర్ 14వ తేది నుంచి ప్రభుత్వం ధరణి బియ్యాన్ని అందుబాటులోకి తీసుకొచ్చిందని తెలిపారు.ఇప్పటివరకు మదనపల్లిలో 3,000 ప్యాకెట్లు అమ్ముడయ్యాయని వివరించారు.ఉదయం 10 గంటల నుంచి మధ్యాహ్నం 2:30 గంటల వరకు సాయంత్రం 3 గంటల నుంచి 5:30 గంటల వరకు రైతు బజార్లో ధరణి బియ్యం సరఫరా చేస్తున్నామని,అవసరమైన వారు ఈ అవకాశాన్ని సద్వినియోగం చేసుకోవాలని తెలిపారు.అదేవిధంగా ఎర్రగడ్డలను సైతం కిలో రూ.35కే విక్రయిస్తున్నట్లు వారు తెలిపారు.

రిపోర్టర్ : కే.ఈశ్వర్ రెడ్డి,మదనపల్లి నియోజకవర్గం ఇంచార్జి