తహసీల్దార్ కందుల కుశరాజుకు వినతి పత్రం అందించిన రేషన్ డీలర్లు

ఆలమూరు మేజర్ న్యూస్ :రేషన్ డీలర్ల సమస్యలను వెంటనే పరిష్కరించాలని, కొత్తగా తీసుకొచ్చిన క్యూఆర్ కోడ్ విధానాన్ని రద్దు చేయాలని డీలర్ల సంక్షేమ సంఘం నాయకులు ప్రభుత్వాన్ని కోరారు. రాష్ట్ర సంఘం పిలుపు మేరకు మంగళవారం మండల రేషన్ డీలర్ల అధ్యక్షులు ఎస్ గోపాలకృష్ణ, కె జయరాజు, కె శివకుమార్ ఆధ్వర్యంలో వారంతా తహసీల్దార్‌ కందుల కుశరాజుకు ఈ మేరకు పలు డిమాండ్లతో కూడిన వినతిపత్రం సమర్పించారు. 

ప్రధానంగా రేషన్ డీలర్ల కమిషన్‌ను ప్రస్తుతమున్న కిలోకు రూ.1 నుంచి రూ.3కు పెంచాలని వారు కోరారు. క్యూఆర్ కోడ్ విధానంతో డీలర్లపై ఆర్థిక, పనిభారం పెరిగి రేషన్ పంపిణీ ఆలస్యమవుతోందన్నారు. ముఖ్యంగా ఈ విధానం వల్ల మహిళా డీలర్లు పడుతున్న సమస్యలను పరిష్కరించాలని విజ్ఞప్తి చేశారు. కొన్ని రేషన్ షాపులకు సివిల్ కేసుల కారణంగా బియ్యం సరఫరా నిలిచిపోవడం, నామినీలకు సంబంధించిన ఆథరైజేషన్లు పెండింగ్‌లో ఉండటం వంటి సమస్యలను కూడా పరిష్కరించాలని కోరారు. 

వీటితో పాటు రేషన్ షాపులకు అవసరమైన మౌలిక వసతులు కల్పించాలని కోరారు. హెల్త్ కార్డుల స్థానంలో  ఇ ఎస్ ఐ సౌకర్యంతో కూడిన వైద్య సదుపాయం కల్పించాలని, నెల, నెలా గౌరవ వేతనం అందజేయాలని కోరారు.