స్వచ్ఛ నగరమే లక్ష్యంగా.. చీపురుపట్టిన ఎమ్మెల్యే లోకం మాధవి
నెల్లిమర్ల, సూర్య : 'స్వచ్ఛమైన నెల్లిమర్ల' లక్ష్యంగా, 'స్వచ్ఛంద స్వర్ణాంధ్ర' ధ్యేయంతో నెల్లిమర్ల నగర పంచాయతీ పరిధిలో పారిశుధ్య కార్యక్రమాలు జోరుగా సాగాయి. సోమవారం జరజాపేట బీసీ కాలనీల్లో నిర్వహించిన స్వచ్ఛతా కార్యక్రమంలో స్థానిక ఎమ్మెల్యే లోకం నాగ మాధవి స్వయంగా పాల్గొని అందరికీ ఆదర్శంగా నిలిచారు.
కేవలం ఆదేశాలు ఇవ్వడమే కాకుండా, స్వయంగా పారిశుధ్య కార్మికులతో కలిసి ఆమె రోడ్లపై చీపురుపట్టి పరిశుభ్రత కార్యక్రమాల్లో భాగస్వామ్యమయ్యారు. ఈ సందర్భంగా స్థానిక ప్రజలకు పరిసరాల పరిశుభ్రత ప్రాముఖ్యతపై అవగాహన కల్పించారు.
పరిశుభ్రమైన పరిసరాలే ఆరోగ్యకరమైన జీవనానికి బలమైన పునాదులని ఎమ్మెల్యే స్పష్టం చేశారు. స్వచ్ఛమైన ఆంధ్రప్రదేశ్ నిర్మాణంలో కేవలం ప్రభుత్వ యంత్రాంగమే కాకుండా, ప్రజలు, ప్రజాప్రతినిధులు, పారిశుధ్య కార్మికులు సమష్టిగా భాగస్వాములు కావాలని పిలుపునిచ్చారు.
పరిసరాలను శుభ్రంగా ఉంచుకోవడం ప్రతి ఒక్కరి పౌర బాధ్యత అని ఆమె గుర్తుచేశారు. కార్యక్రమంలో జనసేన నాయకులు రవ్వా నాని, అప్పికొండ రవికుమార్, జనా ప్రసాద్, గంటా సతీష్, వాసు, అవనాపు మురళి తదితరులు పాల్గొన్నారు.
రిపోర్టర్ : రాజారావు, నెల్లిమార్ల, విజయనగరం జిల్లా.
