సిపిఎం ఎంపీటీసీ ప్రజా సమస్యల పరిష్కారం కొరకు కృషి
శ్రీకాళహస్తిసూర్య ప్రతినిధి; తొట్టంబేడు మండలం; బోనుపల్లి ఎంపీటీసీగా ఏకగ్రీవంగా ఎన్నికైన సీ. చాముండేశ్వరి ప్రజా సమస్యల పరిష్కారానికి నిరంతరం కృషి చేస్తారని సీపీఎం జిల్లా కార్యదర్శి వందవాసి నాగరాజు తెలిపారు. ప్రజల సమస్యలను గుర్తించి, వాటిని ప్రభుత్వం, సంబంధిత అధికారుల దృష్టికి తీసుకెళ్లి పరిష్కారం సాధించడమే ఆమె ప్రధాన బాధ్యతగా పనిచేస్తారని పేర్కొన్నారు. స్థానిక పుచ్చలపల్లి సుందరయ్య భవనంలో బుధవారం నిర్వహించిన మీడియా సమావేశంలో ఆయన మాట్లాడారు.
సీపీఎం తరపున ఎంపీటీసీగా ఎన్నికైన చాముండేశ్వరి ప్రజలతో మమేకమై, వారి కష్టసుఖాల్లో భాగస్వామిగా ఉంటారని నాగరాజు అన్నారు. ప్రజా సమస్యలపై జరిగే పోరాటాల్లో ముందుండి, గ్రామ అభివృద్ధితోపాటు ప్రజలకు అవసరమైన మౌలిక సదుపాయాల కల్పనకు కృషి చేయాలని సూచించారు. ప్రజలు ఎదుర్కొంటున్న సమస్యలను ఆమె దృష్టికి తీసుకురావాలని, వాటి పరిష్కారానికి ప్రజలంతా సహకరించాలని కోరారు. ప్రజల విశ్వాసాన్ని నిలబెట్టుకుంటూ బాధ్యతాయుతంగా పనిచేయడం ద్వారా ఎంపీటీసీ పదవికి సార్థకత చేకూర్చాలని ఆకాంక్షించారు. చాముండేశ్వరిని ఏకగ్రీవంగా ఎన్నుకున్న బోనుపల్లి ప్రజలకు, ఆమె ఎన్నికకు సహకరించిన వారందరికీ సీపీఎం తరపున వందవాసి నాగరాజు కృతజ్ఞతలు తెలిపారు. సీపీఎం జిల్లా కార్యదర్శివర్గ సభ్యులు అంగేరి పుల్లయ్య, ప్రాంతీయ కార్యదర్శి గంధం మణి, పెనగడం గురవయ్య, వెంకటేష్, గురునాధం, రాజా తదితరులు పాల్గొన్నారు.
వీసీ వెంకటయ్య సూర్య దినపత్రిక ఇన్చార్జి శ్రీకాళహస్తి
