శ్రీకాకుళం కార్పొరేషన్ అభివృద్ధికి కూటమి బాధ్యత తీసుకుంది.. అఖండ మెజారిటీతో గెలిపించండి– కేంద్ర మంత్రి కింజరాపు రామ్మోహన్ నాయుడు
శ్రీకాకుళం, మేజర్ న్యూస్: శ్రీకాకుళం నగర అభివృద్ధికి కూటమి ప్రభుత్వం పూర్తి బాధ్యత తీసుకుందని, అదే బాధ్యతతో ప్రజలు తమ విలువైన ఓటును కూటమి అభ్యర్థులకు వేసి అఖండ మెజారిటీతో గెలిపించాలని కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు పిలుపునిచ్చారు. ఆదివారం మంత్రి నాదెండ్ల మనోహర్, ఎంపీ కలిశెట్టి అప్పలనాయుడు, ఎమ్మెల్యేలు గొండు శంకర్, లోకం మాధవి, వంశీకృష్ణ యాదవ్, కూటమి నాయకులు, కార్యకర్తలతో కలిసి శ్రీకాకుళం నగరంలోని 57, 59, 60, 1, 2, 4, 5, 6, 7 వార్డుల్లో ఎన్నికల ప్రచారం నిర్వహించారు. ఈ సందర్భంగా ఇంటింటికీ వెళ్లి కూటమి అభ్యర్థులను గెలిపించాలని ప్రజలను కోరారు. రాష్ట్రంలో ఇటీవల జరిగిన ఎన్నికల్లో కూటమి ప్రభుత్వం చేపడుతున్న అభివృద్ధి, సంక్షేమ కార్యక్రమాలకు ప్రజలు సంపూర్ణ మద్దతు తెలిపారని, అన్ని ఎన్నికల్లోనూ వన్సైడ్ విజయాన్ని అందించారని రామ్మోహన్ నాయుడు పేర్కొన్నారు. అదే విజయపరంపరను శ్రీకాకుళం నగరపాలక సంస్థ ఎన్నికల్లోనూ కొనసాగించాలని కోరారు. నగర పరిధిలో ఇప్పటికే అనేక అభివృద్ధి కార్యక్రమాలు చేపట్టామని, వాటిని మరింత వేగంగా ముందుకు తీసుకెళ్లాలంటే కార్పొరేషన్లోనూ కూటమి నాయకత్వం అవసరమని స్పష్టం చేశారు. గత పాలకుల హయాంలో తెలుగుదేశం పార్టీ జెండా పట్టుకుంటేనే కేసులు పెట్టే పరిస్థితులు ఉండేవని, నేడు ముఖ్యమంత్రి చంద్రబాబు నాయుడు నాయకత్వంలో ప్రజలకు చేరువైన ప్రజారంజక పాలన అందిస్తున్నామని తెలిపారు. చంద్రబాబు నాయకత్వంపై దేశవ్యాప్తంగా పెట్టుబడిదారుల్లో విశ్వాసం పెరిగిందని, ఇటీవల జరిగిన సీఐఐ పార్ట్నర్షిప్ సమ్మిట్ ద్వారా రాష్ట్రానికి సుమారు రూ.9 లక్షల కోట్ల పెట్టుబడులు రావడం శుభపరిణామమని పేర్కొన్నారు. అభివృద్ధి వికేంద్రీకరణతో రాష్ట్రంలోని అన్ని ప్రాంతాలు ప్రగతి పథంలో ముందుకు సాగుతున్నాయని, ఈ విషయాన్ని ప్రజలు గుర్తించాలని కోరారు. కార్యకర్తల కష్టానికి తగిన గౌరవం కల్పిస్తూ కార్పొరేషన్ ఎన్నికలు నిర్వహిస్తున్న ఘనత కూటమి ప్రభుత్వానిదని, మరోవైపు 16 సంవత్సరాల పాటు ఎన్నికలను అడ్డుకుని నగర అభివృద్ధిని నిలిపివేసిన ఘనత గత పాలకులు, ఇతర రాజకీయ పక్షాలదని విమర్శించారు. అభివృద్ధి లక్ష్యంగా ఎమ్మెల్యే గొండు శంకర్తో కలిసి వేగంగా అడుగులు వేస్తుంటే, ఇతర రాజకీయ పక్షాలు అనవసర విమర్శలు చేయడం హాస్యాస్పదంగా ఉందని అన్నారు. రాబోయే కార్పొరేషన్ ఎన్నికల్లో ఓటింగ్ విషయంలో ప్రజలకు ఎలాంటి గందరగోళం ఉండకూడదని మంత్రి స్పష్టం చేశారు. మేయర్ అభ్యర్థికి గాజు గ్లాసు గుర్తుపై, ఆయా వార్డుల్లో కూటమి అభ్యర్థులకు కేటాయించిన గుర్తులపై ఓటు వేసి గెలిపించాలని విజ్ఞప్తి చేశారు. గాజు గ్లాసు, సైకిల్ గుర్తులపై పోలైన ఓట్ల మధ్య ఎలాంటి వ్యత్యాసం లేకుండా, గత ఎంపీ, ఎమ్మెల్యే ఎన్నికల్లో వచ్చిన మెజారిటీ కంటే ఒక్క ఓటు ఎక్కువతోనైనా మొత్తం 60 వార్డుల్లో కూటమి అభ్యర్థులు ఆధిక్యత సాధించాలని పిలుపునిచ్చారు. కాగా, కేంద్ర మంత్రి ఎన్నికల ప్రచారానికి ప్రతి వార్డులోనూ ప్రజల నుంచి విశేష స్పందన లభించింది. మహిళలు హారతులు పట్టి స్వాగతం పలుకుతూ తమ మద్దతు, ఆశీర్వాదాలు అందించారు. ప్రజలు, కార్యకర్తలు ప్రచార రథం వెంట ఉత్సాహంగా నడుస్తూ కూటమి నాయకత్వానికి అనుకూలంగా నినాదాలు చేశారు.