శనగ విత్తనాలేవీ.. అన్నదాతల గోడు వినేదెవరు?

పామూరు, మేజర్ న్యూస్ :  సాగుకు సమయం ఆసన్నమైంది. పొలాలు సిద్ధమయ్యాయి. విత్తనాల కోసం అన్నదాతలు ఎదురుచూస్తున్నారు. కానీ వ్యవసాయ శాఖ నుంచి మాత్రం ఆశించిన స్థాయిలో స్పందన కరువైంది. రబీ సీజన్‌లో శనగ సాగుకు సిద్ధమైన పామూరు మండల రైతులకు రాయితీ శనగ విత్తనాల కొరత తీవ్ర సమస్యగా మారింది. మండలానికి 1,000 క్వింటాళ్ల శనగ విత్తనాలు అవసరమని జిల్లా అధికారులకు తెలియజేసినా ఇప్పటివరకు కేవలం 100 క్వింటాళ్లు మాత్రమే సరఫరా కావడం రైతాంగాన్ని ఆందోళనకు గురిచేస్తోంది. మిగిలిన 900 క్వింటాళ్ల విత్తనాల జాడ లేకపోవడంతో అసలు నిర్లక్ష్యం ఎవరిది రైతుల సాగు అవసరాలు అధికారులకు పట్టవా అన్న ప్రశ్నలు అన్నదాతల నుంచి వినిపిస్తున్నాయి. ప్రస్తుతం వచ్చిన 100 క్వింటాళ్ల శనగ విత్తనాలు పడమరకట్టకిందపల్లి పంచాయతీకి చేరాయి. మండలానికి అవసరమైన వెయ్యి క్వింటాళ్లలో పదో వంతు మాత్రమే అందుబాటులోకి రావడంతో మిగిలిన గ్రామాల రైతులకు విత్తనాల కోసం ఎదురుచూపులు తప్పడం లేదు.

 పామూరు మండలంలోని వగ్గంపల్లి, గుమ్మలంపాడు, చింతలపాలెం, దూబగుంట, దాదిరెడ్డిపల్లి, పడమరకట్టకిందపల్లి, డీవీపల్లి తదితర గ్రామాల్లో రైతులు శనగ సాగు కోసం ఇప్పటికే పొలాలను దుక్కులు దున్ని మందు ఎత్తించి సిద్ధం చేసుకున్నారు. విత్తనాలు వేసేందుకు సమాయత్తమవుతున్న తరుణంలో కొరత ఏర్పడటంతో సాగు పనులు ముందుకు సాగడం లేదు. బంగాళాఖాతంలో ఏర్పడిన అల్పపీడనం ప్రభావంతో వర్షాలు కురిసే అవకాశం ఉందన్న వాతావరణ శాఖ సూచనలు రైతులను మరింత కలవరపెడుతున్నాయి. వర్షాలు కురిసేలోపు విత్తనాలు అందకపోతే సాగు సమయం చేజారిపోయి తీవ్రంగా నష్టపోవాల్సి వస్తుందని అన్నదాతలు ఆవేదన వ్యక్తం చేస్తున్నారు. గత ఏడాది రబీ సీజన్‌లో ప్రభుత్వ నిబంధనల ప్రకారం రాయితీ విత్తనాలు పంపిణీ చేసిన అధికారులు ఈ ఏడాది ఎందుకు పూర్తిస్థాయిలో సరఫరా చేయలేకపోతున్నారన్నది ప్రశ్నార్థకంగా మారింద మండలానికి వెయ్యి క్వింటాళ్ల విత్తనాలు అవసరమని తెలిసినా కేవలం వంద క్వింటాళ్లు మాత్రమే పంపడం వెనుక కారణమేమిటి మిగిలిన 900 క్వింటాళ్లను జిల్లా అధికారులు ఎందుకు సరఫరా చేయడం లేదు రైతుల సాగు అవసరాలపై ముందస్తు ప్రణాళిక లేదా అన్న ప్రశ్నలు వ్యక్తమవుతున్నాయి. ఇప్పటికైనా జిల్లా వ్యవసాయ శాఖ ఉన్నతాధికారులు తక్షణమే స్పందించి పామూరు మండలానికి రావాల్సిన మిగిలిన 900 క్వింటాళ్ల రాయితీ శనగ విత్తనాలను యుద్ధప్రాతిపదికన తెప్పించి రైతులకు అందుబాటులో ఉంచాలని అన్నదాతలు డిమాండ్ చేస్తున్నారు. కనిగిరి ఎమ్మెల్యే డాక్టర్ ముక్కు ఉగ్ర నరసింహారెడ్డి ప్రత్యేక చొరవ తీసుకుని అధికారులతో మాట్లాడి విత్తనాల సరఫరా జరిగేలా చూడాలని కోరుతున్నారు. కీలకమైన రబీ సాగు సమయంలో విత్తనాల కొరతతో రైతులు నష్టపోకుండా ప్రభుత్వం, వ్యవసాయ శాఖ ఉన్నతాధికారులు వెంటనే స్పందించి అన్నదాతలను ఆదుకోవాలని రైతాంగం విజ్ఞప్తి చేస్తున్నారు.