శాంతిభద్రతల పరిరక్షణే ప్రథమ ప్రాధాన్యం......… ఎన్నికల నిర్వహణకు పకడ్బందీ చర్యలు.. అసాంఘిక కార్యకలాపాలకు పాల్పడితే కఠిన చర్యలు చిన్నచిన్న విషయాలకే ఘర్షణలకు దిగొద్దు.. సంయమనం పాటించాలి సిబ్బంది కొరత ఉన్నా సమన్వయంతో ముందుకు సాగుతాం ఫ్రెండ్లీ పోలీసింగ్‌తో ప్రజలకు చేరువవుతాం కళ్యాణదుర్గం డీఎస్పీ ద
అనంతపురం బ్యూరో : డివిజన్ పరిధిలో శాంతిభద్రతలను పరిరక్షించడమే ప్రధాన లక్ష్యంగా పనిచేస్తామని కళ్యాణదుర్గం డీఎస్పీ దైవప్రసాద్ స్పష్టం చేశారు. రానున్న ఎన్నికలను ప్రశాంత వాతావరణంలో, ఎలాంటి అవాంఛనీయ సంఘటనలకు తావులేకుండా నిర్వహించేందుకు పోలీసు శాఖ తరఫున ప్రత్యేక చర్యలు చేపడతామని తెలిపారు. ప్రజలు చిన్నచిన్న విషయాలకే గొడవలకు దిగకుండా సంయమనం పాటించాలని, సమస్యలు తలెత్తితే చట్టాన్ని చేతుల్లోకి తీసుకోకుండా పోలీసులను ఆశ్రయించాలని సూచించారు.
ఇటీవల కళ్యాణదుర్గం డీఎస్పీగా బాధ్యతలు స్వీకరించిన దైవప్రసాద్ తన ఉద్యోగ ప్రస్థానం, విధి నిర్వహణలో ప్రాధాన్యతలను వివరించారు. 1995లో తొలిసారిగా ఎస్సైగా బాధ్యతలు చేపట్టిన ఆయన కర్నూలు జిల్లాలో సుమారు 20 సంవత్సరాల పాటు విధులు నిర్వహించారు. అనంతరం అనంతపురం జిల్లాలోని పలు ప్రాంతాల్లో పనిచేశారు. పెద్దవడుగూరు, ఆగళి పోలీస్‌స్టేషన్లలో విధులు నిర్వర్తించడంతో పాటు విజయవాడలో ఏసీపీగా, మహిళా పోలీస్‌స్టేషన్‌లోనూ బాధ్యతలు నిర్వహించినట్లు తెలిపారు. అనంతరం బదిలీపై కళ్యాణదుర్గం డీఎస్పీగా బాధ్యతలు స్వీకరించారు.
ఎన్నికలపై ప్రత్యేక దృష్టి
రానున్న ఎన్నికల నేపథ్యంలో సమస్యాత్మక ప్రాంతాలను గుర్తించి ముందస్తు చర్యలు తీసుకుంటామని డీఎస్పీ తెలిపారు. అవసరమైన ప్రాంతాల్లో పోలీసు బందోబస్తును పటిష్టం చేయడంతో పాటు ప్రజల్లో అవగాహన కల్పిస్తామన్నారు. ఎన్నికల సమయంలో ఎలాంటి ఘర్షణలు, అవాంఛనీయ సంఘటనలు చోటుచేసుకోకుండా అన్ని వర్గాల ప్రజలు పోలీసులకు సహకరించాలని కోరారు. ప్రజాస్వామ్యబద్ధంగా ఎన్నికలు ప్రశాంతంగా జరిగేలా పోలీసు శాఖ అప్రమత్తంగా ఉంటుందని పేర్కొన్నారు.
చిన్న విషయాలకు ఘర్షణలు వద్దు
చిన్నచిన్న సమస్యలను పెద్దవిగా చేసుకుని ఘర్షణలకు దిగడం వల్ల కుటుంబాలు, సమాజంలో అనవసర ఇబ్బందులు తలెత్తుతాయని దైవప్రసాద్ అన్నారు. ముఖ్యంగా కరువు పరిస్థితులు, పంటల సమస్యలతో ప్రజలు ఇబ్బందులు ఎదుర్కొంటున్న సమయంలో సంయమనం పాటించడం అవసరమన్నారు. వ్యక్తిగత వివాదాలు, చిన్నపాటి మనస్పర్థలు పెద్ద గొడవలకు దారితీయకుండా ప్రజలు బాధ్యతగా వ్యవహరించాలని సూచించారు. శాంతిభద్రతలకు విఘాతం కలిగించేలా ఎవరైనా ప్రవర్తిస్తే ఉపేక్షించబోమని హెచ్చరించారు.
సిబ్బంది కొరతను అధిగమిస్తాం
కళ్యాణదుర్గం డీఎస్పీ పరిధిలో పోలీసు సిబ్బంది కొరత ఉన్నప్పటికీ అందుబాటులో ఉన్న సిబ్బందితో సమన్వయం చేసుకుంటూ విధులు నిర్వహిస్తామని తెలిపారు. ప్రజల భద్రతకు ప్రాధాన్యమిస్తూ శాంతిభద్రతల పరిరక్షణలో ఎలాంటి నిర్లక్ష్యానికి తావులేకుండా చర్యలు తీసుకుంటామన్నారు. సిబ్బందిని సమర్థవంతంగా వినియోగించుకుంటూ ప్రజలకు పోలీసు సేవలను మరింత చేరువ చేస్తామని పేర్కొన్నారు.
అసాంఘిక కార్యకలాపాలపై కఠిన చర్యలు
డివిజన్ పరిధిలో అసాంఘిక, చట్టవ్యతిరేక కార్యకలాపాలకు పాల్పడే వారిపై కఠిన చర్యలు తీసుకుంటామని డీఎస్పీ దైవప్రసాద్ స్పష్టం చేశారు. వ్యక్తుల స్థాయి, పలుకుబడితో సంబంధం లేకుండా చట్టాన్ని ఉల్లంఘించిన వారిపై నిబంధనల ప్రకారం చర్యలు ఉంటాయని హెచ్చరించారు. ప్రజలు ఎలాంటి సమస్యలు ఎదుర్కొన్నా పోలీసుల దృష్టికి తీసుకురావాలని, చట్టాన్ని తమ చేతుల్లోకి తీసుకోవద్దని సూచించారు.
ఫ్రెండ్లీ పోలీసింగ్‌తో ప్రజలకు చేరువ
పోలీసు శాఖపై ప్రజల్లో నమ్మకం పెంచడమే లక్ష్యంగా ఫ్రెండ్లీ పోలీసింగ్‌కు ప్రాధాన్యం ఇస్తామని దైవప్రసాద్ తెలిపారు. పోలీసులు ప్రజలతో స్నేహపూర్వకంగా మెలుగుతూ వారి సమస్యలను తెలుసుకుని పరిష్కారానికి కృషి చేయాలని భావిస్తున్నట్లు చెప్పారు. శాంతిభద్రతల పరిరక్షణతో పాటు ప్రజలకు, పోలీసులకు మధ్య వారధిగా పనిచేస్తామని పేర్కొన్నారు.
ప్రజలు ప్రశాంతంగా జీవించే వాతావరణాన్ని కల్పించడం, ఎన్నికలను పకడ్బందీగా నిర్వహించడం, అసాంఘిక కార్యకలాపాలను అరికట్టడం తమ ప్రధాన లక్ష్యాలని డీఎస్పీ స్పష్టం చేశారు. ప్రజల సహకారంతో కళ్యాణదుర్గం డివిజన్‌లో శాంతియుత వాతావరణాన్ని కొనసాగించేందుకు కృషి చేస్తామని తెలిపారు.
రిపోర్టర్ : మొయినుద్దీన్, అనంతపురం బ్యూరో, అనంతపురం.
