రేషన్ డీలర్ల సమస్యలు పరిష్కరించాలి : రావులపాలెం మండల రేషన్ డీలర్ల సంఘం డిమాండ్‌
రావులపాలెం మేజర్ న్యూస్: రేషన్ సరుకుల పంపిణీలో డీలర్లు ఎదుర్కొంటున్న ఇబ్బందులను తొలగించాలని, క్యూఆర్‌ కోడ్‌ విధానాన్ని రద్దు చేయాలని రావులపాలెం మండల రేషన్ డీలర్ల సంఘం డిమాండ్‌ చేసింది. రేషన్ డీలర్లు ఎదుర్కొంటున్న పలు సమస్యలను పరిష్కరించడంతోపాటు, ఆర్థిక ఇబ్బందుల నుంచి గట్టెక్కించేందుకు క్వింటాకు రూ.3 కమిషన్‌ పెంచాలని కోరింది.
ఈ మేరకు రావులపాలెం మండల రేషన్ డీలర్ల సంఘం అధ్యక్షుడు మట్ట బాబ్జి ఆధ్వర్యంలో డీలర్లు పలు డిమాండ్లతో కూడిన వినతిపత్రాన్ని రావులపాలెం డిప్యూటీ తహసీల్దార్ శ్రీనివాస్‌కు అందజేశారు.
ప్రస్తుత క్యూఆర్‌ కోడ్‌ విధానం వల్ల రేషన్ సరుకుల పంపిణీలో ఇబ్బందులు ఎదురవుతున్నాయని డీలర్లు పేర్కొన్నారు. ఈ విధానాన్ని తొలగించి, పంపిణీ ప్రక్రియను సులభతరం చేయాలని కోరారు. చాలీచాలని కమిషన్‌తో కుటుంబాలను పోషించుకోవడం కష్టంగా మారిందని, నిర్వహణ ఖర్చులు పెరగడంతో ఆర్థికంగా ఇబ్బందులు పడుతున్నామని ఆవేదన వ్యక్తం చేశారు.
డీలర్ల సమస్యలను ప్రభుత్వం దృష్టికి తీసుకెళ్లి, న్యాయం జరిగేలా చర్యలు తీసుకోవాలని విజ్ఞప్తి చేశారు. కూటమి ప్రభుత్వం తమ సమస్యలపై సానుకూలంగా స్పందించి, కమిషన్‌ పెంపుతోపాటు ఇతర సమస్యలను పరిష్కరించాలని కోరారు.ఈ కార్యక్రమంలో డి ఎస్ ఆర్ మూర్తి కొవ్వూరి సత్తిరెడ్డి బొక్క శ్రీనివాసరావు సూరంపూడి శ్రీనివాసరావు పడాల శ్రీనివాస్ రెడ్డి గంధం శివ నిచ్చెనకోళ్ల వెంకటేశ్వరరావు మట్టపర్తి శ్రీనివాస్ బెజవాడ గోవిందరావు గుర్రాల వీరన్న తదితరులు పాల్గొన్నారు
