andhrapradesh
రేపే ఎంపీటీసీ, జెడ్పీటీసీ ఎన్నికల పోలింగ్
అమరావతి:ఆంధ్రప్రదేశ్‌లో ఎంపీటీసీ, జెడ్పీటీసీ ఎన్నికల పోలింగ్‌కు రాష్ట్ర ఎన్నికల సంఘం (ఎస్‌ఈసీ) అన్ని ఏర్పాట్లను పూర్తి చేసింది. ముందస్తు షెడ్యూల్ ప్రకారమే రేపు (గురువారం) నిరంతర పర్యవేక్షణ నడుమ ఎంపీటీసీ, జెడ్పీటీసీ ఎన్నికల పోలింగ్ యథావిధిగా జరుగుతుందని ఎస్‌ఈసీ స్పష్టం చేసింది.
రాష్ట్రవ్యాప్తంగా నిర్వహించే ఈ ఎన్నికల్లో దాదాపు 2.61 కోట్ల మంది ఓటర్లు తమ ఓటు హక్కును వినియోగించుకోనుండగా, వారి కోసం 31,460 పోలింగ్ కేంద్రాలను సిద్ధం చేశారు. ఎలాంటి అవాంఛనీయ సంఘటనలు జరగకుండా, ప్రశాంతమైన వాతావరణంలో పోలింగ్ నిర్వహించేందుకు దాదాపు 2.52 లక్షల మంది అధికారులు, సిబ్బందిని ఎన్నికల విధుల్లో నియమించారు.
అలాగే, నిబంధనల ఉల్లంఘనలు మరియు అక్రమాలను అరికట్టడానికి అన్ని పోలింగ్ కేంద్రాలలో సీసీటీవీ కెమెరాలు, వీడియోగ్రఫీ ద్వారా ఎస్‌ఈసీ నిరంతర పర్యవేక్షణను ఏర్పాటు చేసింది. పోలింగ్ ప్రక్రియ ఉదయం 7 గంటల నుంచే ప్రారంభం కానుండటంతో, సమస్యాత్మక ప్రాంతాల్లో కట్టుదిట్టమైన భద్రతా చర్యలు చేపట్టినట్లు అధికారులు వెల్లడించారు.
