భారీ వర్షాల నేపథ్యంలో ఎన్నికల ఏర్పాట్లపై కలెక్టర్ అప్రమత్తం
విజయవాడ, మేజర్ న్యూస్: భారీ వర్షాల నేపథ్యంలో ఎన్నికల నిర్వహణకు ఎలాంటి ఆటంకాలు కలగకుండా అధికార యంత్రాంగం అప్రమత్తంగా ఉండాలని ఎన్టీఆర్ జిల్లా కలెక్టర్ డాక్టర్ జి. లక్ష్మీశ ఆదేశించారు. పోలింగ్ కేంద్రాల వద్ద వర్షపు నీరు నిల్వ ఉండకుండా యుద్ధప్రాతిపదికన చర్యలు చేపట్టాలని, బ్యాలెట్ బాక్సులు, ఎన్నికల సామగ్రి తడవకుండా పటిష్టమైన భద్రతా చర్యలు తీసుకోవాలని సూచించారు. అధికారులు క్షేత్రస్థాయిలో పర్యటిస్తూ ఎన్నికల ఏర్పాట్లను పర్యవేక్షించాలని, వాగులు, వంకలు పొంగే ప్రాంతాల్లో ప్రత్యామ్నాయ మార్గాలు సిద్ధం చేయాలని తహసీల్దార్లను ఆదేశించారు. ఎన్నికల వాహనాల రాకపోకలకు ఆటంకం కలగకుండా క్రేన్లు, జేసీబీలు అందుబాటులో ఉంచాలని, పోలింగ్, పోలీసు సిబ్బందికి భోజనం, వైద్యం, ఇతర కనీస సౌకర్యాలు కల్పించాలని స్పష్టం చేశారు. ముంపు ప్రాంతాలు, ఏటిగట్ల వెంబడి రెవెన్యూ అధికారులు నిరంతరం నిఘా ఉంచాలని, అవసరమైతే డ్రోన్లను వినియోగించాలని సూచించారు. శిథిలావస్థలో ఉన్న ఇళ్లలో నివసిస్తున్న ప్రజలను వెంటనే పునరావాస కేంద్రాలకు తరలించాలని, భారీ వర్షాల ప్రభావాన్ని దృష్టిలో ఉంచుకుని ప్రజల భద్రతకు ప్రాధాన్యతనిస్తూ ఎన్నికలు ప్రశాంతంగా, సజావుగా జరిగేలా అధికారులు అంకితభావంతో పనిచేయాలని కలెక్టర్ ఆదేశించారు.
స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.
