రాజ రాజేశ్వరిగా బెజవాడ కనకదుర్గమ్మ

విజయవాడలోని ప్రసిద్ధ పుణ్యక్షేత్రమైన ఇంద్రకీలాద్రిపై దసరా శరన్నవరాత్రి ఉత్సవాలు నేడు విజయదశమి పర్వదినాన్ని పురస్కరించుకుని అత్యంత వైభవంగా ముగియనున్నాయి. ఈ ప్రత్యేక సందర్భాన్ని పురస్కరించుకుని జగన్మాత భక్తులకు శ్రీ రాజరాజేశ్వరి దేవి అలంకారంలో అభయప్రదానం చేస్తున్నారు. ఉత్సవాల్లో చివరి రోరైన నేడు తెల్లవారుజాము నుంచే అమ్మవారి దర్శనార్థం భక్తులు పెద్ద ఎత్తున పోటెత్తారు. భక్తులకు ఎలాంటి అసౌకర్యం కలగకుండా అధికారులు అన్ని ఏర్పాట్లు చేశారు.

ఇక దసరా ఉత్సవాల ముగింపులో భాగంగా ఉదయం 10:30 గంటలకు వేదపండితుల మంత్రోచ్ఛారణల మధ్య మహా పూర్ణాహుతి కార్యక్రమం నిర్వహించనున్నారు. అలాగే మధ్యాహ్నం 1:00 గంటల నుంచి 2:00 గంటల మధ్య ఆంధ్రప్రదేశ్ గవర్నర్ ఎస్. అబ్దుల్ నజీర్ ఇంద్రకీలాద్రిని సందర్శించి అమ్మవారిని దర్శించుకోనున్నారు. ఈ వేడుకలన్నింటిలోకీ అత్యంత ప్రధానమైన ఘట్టమైన హంసవాహన తెప్పోత్సవాన్ని సాయంత్రం కృష్ణా నదిలో కన్నులపండువగా నిర్వహించనున్నారు. కృష్ణమ్మ ఒడ్డున విద్యుద్దీపాల కాంతుల మధ్య జరిగే ఈ తెప్పోత్సవాన్ని వీక్షించేందుకు భక్తులు భారీగా తరలివస్తున్నారు.