ప్రభుత్వ పాఠశాలల విద్యార్థుల సర్వాంగీణ వికాసమే 'విద్యా వికాసం–విద్యా వాహిని' లక్ష్యం: మంత్రి నియోజకవర్గ ఇన్చార్జ్ హరీష్ బాబు

ధర్మవరం, సెప్టెంబరు 30:

ధర్మవరం నియోజకవర్గంలోని ప్రభుత్వ పాఠశాలల విద్యార్థులకు నాణ్యమైన విద్య, నాయకత్వ లక్షణాలు, ఆత్మవిశ్వాసాన్ని అందించడమే 'విద్యా వికాసం–విద్యా వాహిని' కార్యక్రమాల ప్రధాన ఉద్దేశమని రాష్ట్ర వైద్య, ఆరోగ్య శాఖ మంత్రి, ధర్మవరం ఎమ్మెల్యే సత్యకుమార్ యాదవ్ నియోజకవర్గ ఇన్చార్జ్ హరీష్ బాబు తెలిపారు. సత్యకుమార్ యాదవ్ చొరవతో, సంస్కృతి సేవా సమితి సహకారంతో ఏకలవ్య ఫౌండేషన్ ఆధ్వర్యంలో ఈ కార్యక్రమాలను నిర్వహిస్తున్నారు.

బుధవారం సాయంత్రం ధర్మవరం పట్టణంలోని మార్కెట్ స్ట్రీట్ వద్ద ఉన్న భగత్ సింగ్, అల్లూరి విద్యా వికాసం కేంద్రాలను హరీష్ బాబు సందర్శించి విద్యార్థులతో ముచ్చటించారు. విద్యార్థులు అందుబాటులోని అవకాశాలను సద్వినియోగం చేసుకుని ఉన్నత లక్ష్యాలను సాధించాలని ఆయన సూచించారు.

ఈ సందర్భంగా ఆయన మాట్లాడుతూ... ధర్మవరం అర్బన్, రూరల్‌‌తో పాటు బత్తలపల్లి, తాడిమర్రి, ముదిగుబ్బ మండలాల్లో మొత్తం 30 ఉచిత విద్యా వికాసం కేంద్రాల ద్వారా 843 మంది విద్యార్థులకు, అలాగే 40 ప్రభుత్వ ఉన్నత పాఠశాలల్లో విద్యా వాహిని కార్యక్రమం ద్వారా విద్యార్థులకు నైపుణ్యాభివృద్ధి, భవిష్యత్ అవకాశాలపై అవగాహన కల్పిస్తున్నట్లు వివరించారు.