పూడిమడకలో ఉప్పుటేరును పరిశీలించిన ఎమ్మెల్యే సుందరపు విజయ్ కుమార్

*మునిగిపోయిన రెండు చైన్ మిషన్లను బయటకు తీసేందుకు చర్యలు - త్వరలో జెట్టీ నిర్మాణం*ఎమ్ ఎల్ ఏ సుందరుపు విజయ్ కుమార్

అచ్యుతాపురం, సెప్టెంబర్ 27: అనకాపల్లి జిల్లా, ఎలమంచిలి నియోజకవర్గం, అచ్యుతాపురం మండలం పూడిమడక గ్రామంలో ఎమ్మెల్యే సుందరపు విజయ్ కుమార్ పర్యటించారు.

గత వారం రోజులుగా కురుస్తున్న భారీ వర్షాల కారణంగా ఉప్పుటేరులో ఇసుక తవ్వకాల పనులకు వినియోగిస్తున్న రెండు చైన్ మిషన్లు నీటిలో చిక్కుకుని మునిగిపోయాయి. ఈ నేపథ్యంలో కూటమి నాయకులతో కలిసి ఎమ్మెల్యే ఉప్పుటేరు వద్దకు వెళ్లి పరిస్థితిని పరిశీలించారు.

ఈ సందర్భంగా ఎమ్మెల్యే మాట్లాడుతూ, నీటిలో మునిగిపోయిన రెండు చైన్ మిషన్లను బయటకు తీసేందుకు జిల్లా కలెక్టర్, రాష్ట్ర హోంమంత్రి, మత్స్యశాఖ అధికారులతో మాట్లాడి ప్రత్యేక రిస్క్ ఆపరేషన్ నిర్వహించేలా చర్యలు తీసుకుంటామని తెలిపారు. మిషన్లను సురక్షితంగా బయటకు తీసుకువస్తామని హామీ ఇచ్చారు.

పూడిమడకలో జెట్టీ నిర్మాణ పనులను త్వరలోనే ప్రారంభించి మత్స్యకారుల సమస్యలను పరిష్కరిస్తామని, జెట్టీ నిర్మాణం పూర్తయ్యే వరకు మత్స్యకారుల బోట్లు రాకపోకలకు తాత్కాలిక సౌకర్యాలు కల్పిస్తామని తెలిపారు. ఇందుకోసం అధికారులతో మాట్లాడి అంచనాలు తయారు చేయించి తాత్కాలిక ఏర్పాట్లు చేస్తామని స్పష్టం చేశారు.

మత్స్యకారులు చేపల వేటకు వెళ్లేందుకు నడకదారి లేక ఇబ్బందులు పడుతున్న విషయాన్ని దృష్టికి తీసుకువచ్చిన మీదట, సీసీ రోడ్డు లేదా గ్రావెల్ రోడ్డు నిర్మాణానికి, అలాగే విద్యుత్ లైన్లు ఏర్పాటుకు కృషి చేస్తామని హామీ ఇచ్చారు.

ఎమ్మెల్యే హామీతో స్థానిక మత్స్యకారులు హర్షం వ్యక్తం చేశారు. ఈ కార్యక్రమంలో మత్స్యకారులు, కూటమి నాయకులు తదితరులు పాల్గొన్నారు.