పి.గన్నవరంలో 28వ రోజుకు చేరిన వీఆర్ఏల నిరసన: పే-స్కేల్ అమలు చేసేవరకు సమ్మె విరమించేది లేదని హెచ్చరిక!

 పి.గన్నవరం మేజర్ న్యూస్ : డాక్టర్ బి.ఆర్. అంబేద్కర్ కోనసీమ జిల్లా పి.గన్నవరం మండలంలో గ్రామ రెవెన్యూ సహాయకుల (వీఆర్ఏ) సహాయ నిరాకరణ ఉద్యమం ఉధృతంగా కొనసాగుతోంది. ఆంధ్రప్రదేశ్ వీఆర్ఏ జేఏసీ ఇచ్చిన పిలుపు మేరకు మండల వీఆర్ఏల సంఘం ఆధ్వర్యంలో చేపట్టిన ఈ సమ్మె మంగళవారం నాటికి 28వ రోజుకు చేరింది.

మండల కేంద్రంలోని తహసీల్దార్ కార్యాలయం ఎదుట వీఆర్ఏలు పెద్ద ఎత్తున నిరసన దీక్ష చేపట్టారు. ప్రభుత్వ వైఖరికి వ్యతిరేకంగా నినాదాలు చేస్తూ తమ న్యాయమైన డిమాండ్లను పరిష్కరించాలని నినదించారు. అర్హులైన వీఆర్ఏలందరికీ పే-స్కేల్ వర్తింపజేయడంతో పాటు ఉద్యోగ భద్రతను తక్షణమే కల్పించాలని నాయకులు డిమాండ్ చేశారు.

గతంలో ప్రభుత్వం ఇచ్చిన హామీలను వెంటనే అమలు చేయాలని, సమస్యలు పరిష్కారమయ్యే వరకు సమ్మెను విరమించే ప్రసక్తే లేదని స్పష్టం చేశారు. ఈ ఆందోళన కార్యక్రమంలో పి.గన్నవరం మండల వీఆర్ఏ సంఘం నాయకులు, సభ్యులు పెద్ద సంఖ్యలో పాల్గొన్నారు.