పెంచలకోనలో వైభవంగా శ్రీవారి సేవలు: రూ.4.14 లక్షల ఆదాయం

నెల్లూరు కల్చరల్/ రాపూరు మేజర్ న్యూస్  :  శ్రీ పొట్టి శ్రీరాములు నెల్లూరు జిల్లా రాపూరు మండలం పెంచలకోనలో శనివారం శ్రీ చెంచులక్ష్మి ఆదిలక్ష్మి సమేత శ్రీ నరసింహస్వామి వారి పూజా కార్యక్రమాలు అత్యంత వైభవంగా జరిగాయి. శనివారం పర్వదినాన్ని పురస్కరించుకుని తెల్లవారుజామున స్వామివారికి విశేష అభిషేకం, ఉదయం నిత్య కల్యాణోత్సవం నిర్వహించారు. సాయంత్రం ప్రధానార్చకులు, వేద పండితుల మంత్రోచ్ఛారణలు, మంగళవాయిద్యాల నడుమ సహస్రదీపాలంకరణ సేవను కనులపండువగా చేపట్టారు. అనంతరం భక్తులు సమర్పించిన 100 గొడుగుల నీడలో స్వామివారి తిరుచ్చి సేవ నేత్రపర్వంగా సాగింది. అన్నదానం తదితర ఏర్పాట్లను ఆలయ ఉప కమిషనర్, కార్యనిర్వహణాధికారి కోవూరు జనార్దన రెడ్డి స్వయంగా పర్యవేక్షించారు.
ఈ రోజు వివిధ సేవా టికెట్లు, కానుకలు, ప్రసాదాల విక్రయాల ద్వారా దేవస్థానానికి మొత్తం రూ.4,14,445 ఆదాయం సమకూరిందని ఈవో జనార్దన రెడ్డి తెలిపారు. ఈ మొత్తాన్ని ఆంధ్రప్రదేశ్ గ్రామీణ బ్యాంకులోని ఆలయ ఖాతాలో జమ చేసినట్లు వెల్లడించారు.

బ్యాటరీ వాహనం కొనుగోలు
మరోవైపు, లడ్డూ పోటుశాల నుంచి విక్రయ కౌంటర్లకు ప్రసాదాలను సురక్షితంగా, వేగంగా రవాణా చేసేందుకు దేవస్థానం నూతనంగా బ్యాటరీ వాహనాన్ని కొనుగోలు చేసింది. స్వామివారి సన్నిధిలో ఈ వాహనానికి శాస్త్రోక్తంగా పూజలు నిర్వహించి, శనివారం నుంచే వినియోగంలోకి తీసుకొచ్చినట్లు అధికారులు తెలిపారు.