పరిషత్ ఓట్ల లెక్కింపు నేడే
శనివారం ఉదయం 8 నుంచి ప్రారంభం
నాలుగు నియోజకవర్గాల్లోని 15 కేంద్రాల్లో ఓట్ల లెక్కింపు
పార్వతీపురం నవంబర్ 06 మేజర్ న్యూస్ : జిల్లాలో ఎంపీటీసీ, జెడ్పీటీసీ ఎన్నికల ఓట్ల లెక్కింపు ప్రక్రియను అత్యంత సజావుగా, పారదర్శకంగా నిర్వహించేందుకు జిల్లా ఎన్నికల యంత్రాంగం మరియు పోలీసు శాఖ సమగ్ర ప్రణాళికతో పటిష్ట ఏర్పాట్లు పూర్తి చేశాయి. జిల్లా కలెక్టర్, జిల్లా ఎన్నికల అధికారి డా ఎన్ ప్రభాకర రెడ్డి పర్యవేక్షణలో కౌంటింగ్ నిర్వహణకు సిద్ధమైంది.
నవంబర్ 7న జరగనున్న ఈ ఓట్ల లెక్కింపు కోసం జిల్లాలోని నాలుగు నియోజకవర్గాల పరిధిలో ఉన్న 15 మండలాలకు సంబంధించి వేర్వేరు ప్రాంతాల్లో 15 కౌంటింగ్ కేంద్రాలను ఏర్పాటు చేశారు. జిల్లా వ్యాప్తంగా మొత్తం 15 జెడ్పీటీసీ స్థానాలతో పాటు 226 ఎంపీటీసీ స్థానాలకు సంబంధించి ఓట్ల లెక్కింపు జరగనుంది.
నియోజకవర్గాల వారీగా ఓట్ల లెక్కింపుకేంద్రాల వివరాలు
పార్వతీపురం నియోజకవర్గానికి సంబంధించి పార్వతీపురం, సీతానగరం, బలిజిపేట మండలాల ఓట్ల లెక్కింపు కార్యక్రమం ప్రభుత్వ జూనియర్ కళాశాలలో జరుగునుంది
పాలకొండ నియోజకవర్గానికి సంబంధించి పాలకొండ, వీరఘట్టం, భామిని, సీతంపేట మండలాల ఓట్ల లెక్కింపు కార్యక్రమం పాలకొండ డిగ్రీ కళాశాల ఫస్ట్ బ్లాక్లో జరగనుంది.
సాలూరు నియోజకవర్గానికి సంబంధించి సాలూరు, మక్కువ, పాచిపెంట మండలాల ఓట్ల లెక్కింపు కార్యక్రమం ప్రభుత్వ డిగ్రీ & పీజీ కళాశాలలో జరగనున్నది*
కురుపాం నియోజకవర్గానికి సంబంధించి కురుపాం, జి ఎల్ పురం, జిఎం వలస, గరుగుబిల్లి, కొమరాడ మండలాల ఓట్ల లెక్కింపు కార్యక్రమం ఉల్లి భద్ర దరి ఉద్యాన కళాశాలలో జరుగనున్నది.
భారీ పోలీసు భద్రత & బందోబస్తు:
కౌంటింగ్ కేంద్రాల వద్ద ఎలాంటి అవాంఛనీయ సంఘటనలు జరగకుండా, శాంతిభద్రతల పరిరక్షణ కోసం జిల్లా పోలీసు యంత్రాంగం భారీ బందోబస్తును రంగంలోకి దించింది. నాలుగు నియోజకవర్గాల స్థాయి కౌంటింగ్ కేంద్రాల వద్ద 382 మంది పోలీస్లు విధులు నిర్వహిస్తున్నారు. 04 డీఎస్పీలు, 16 మంది సీఐ/ఆర్ఐ లు, 20 మంది ఎస్ఐలు, 219 మంది కానిస్టేబుళ్లు, మరియు 123 హోం గార్డ్ సిబ్బందిని నియమించారు. కౌంటింగ్ కేంద్రాల పరిధిలోని సంబంధిత పోలీసు స్టేషన్ల ద్వారా మూడంచెల భద్రతా చర్యలు చేపడుతున్నారు. అధికారులు మరియు సిబ్బంది సమన్వయంతో శనివారం ఉదయం నుంచే బ్యాలెట్ ఓట్ల లెక్కింపు ప్రక్రియను సజావుగా పూర్తి చేసేందుకు అన్ని ఏర్పాట్లు సిద్ధమయ్యాయి.
