పల్లె పోరులోను కూటమిదే విజయం --ఏలూరు అభివృద్ధికి నిధులు రాబట్టడంలోనూ విజయం

ఏలూరు, మేజర్ న్యూస్ :ఏలూరు అసెంబ్లీ నియోజకవర్గంలో అభివృద్ధి పనులను పరుగులు పెట్టించడంతో పాటూ నిధులు రాబట్టడంలోనూ విజయం సాధిస్తూ వస్తున్నామని జిల్లా తెలుగుదేశం పార్టీ అధ్యక్షులు, ఎమ్మెల్యే బడేటి చంటి స్పష్టం చేశారు. ఇదంతా ప్రజల అదృష్టమని ఆయన వ్యాఖ్యానించారు. ఏలూరులోని తన క్యాంపు కార్యాలయంలో శుక్రవారం నిర్వహించిన మీడియా సమావేశంలో ఎమ్మెల్యే బడేటి చంటి మాట్లాడుతూ నగర, పురపోరుతో పాటూ పరిషత్‌ పోరులోనూ కూటమి అత్యధిక స్థానాల్లో విజయం సాధించిందని సంతోషం వ్యక్తం చేశారు. ఇదేక్రమంలో పార్టీలకు అతీతంగా జరిగే పల్లెపోరులోనూ కూటమి మద్దతుదారులే విజయం సాధిస్తారని ఆయన ధీమా వ్యక్తం చేశారు. అనేక స్థానాలను ఏకగ్రీవాలు చేసి గ్రామాల్లో సుహృద్భావ వాతావరణాన్ని కల్పించేందుకు కృషిచేయాలని స్థానిక నాయకత్వాన్ని ఇప్పటికే ఆదేశించినట్లు ఆయన వెల్లడించారు. ఏలూరుకు మంజూరైన 21కోట్ల అర్భన్‌ డెవలప్‌మెంట్‌ అధారిటీ గ్రాంట్స్‌ ద్వారా మరిన్ని అభివృద్ధి కార్యక్రమాలు నిర్వహించనున్నట్లు చెప్పారు. ఈ నిధుల మంజూరు కోసం తాను శ్రమించిన విధానాన్ని వివరించిన ఎమ్మెల్యే చంటి,,, అడిగిన వెంటనే నిధులు కేటాయించిన సీఎం చంద్రబాబుతో పాటూ రాష్ట్ర మున్సిపల్‌ శాఖామంత్రి నారాయణకు ఈ సందర్భంగా ధన్యవాదాలు తెలిపారు. కోడ్‌ అడ్డంకి లేకుంటే ఈ 21కోట్లతో చేపట్టనున్న అభివృద్ధి పనులకు సంబంధించి టెండర్లు ఆహ్వానించనున్నట్లు ఎమ్మెల్యే చంటి స్పష్టం చేశారు. సమావేశంలో మాజీ మంత్రి మరడాని రంగారావు, ఈడా ఛైర్మన్‌ పెద్దిబోయిన శివప్రసాద్‌, టిడిపి నగర అధ్యక్షులు చోడే వెంకటరత్నం, నాయకులు జుంజు మోజెస్‌, మల్లెపు రాము, త్రిపర్ణ రాజేష్‌ తదితరులు పాల్గొన్నారు.