పదవీ విరమణ చేసిన పోలీసు సిబ్బందికి ఆత్మీయ వీడ్కోలు

విజయవాడ క్రైం, మేజర్ న్యూస్ : ఎన్‌టీఆర్ జిల్లా పోలీస్ కమిషనరేట్ పరిధిలో విధులు నిర్వహిస్తూ అక్టోబర్ 31న పదవీ విరమణ పొందిన ఏఎస్ఐ ఎం. శ్రీనివాసరావు, హెడ్ కానిస్టేబుల్ బెజవాడ ఏసోబులకు పోలీస్ శాఖ ఆత్మీయ వీడ్కోలు పలికింది. పోలీస్ కమిషనర్ ఎస్.వి. రాజశేఖర బాబు ఆదేశాల మేరకు పోలీస్ కమిషనర్ కార్యాలయంలో నిర్వహించిన కార్యక్రమంలో అడ్మిన్ డీసీపీ కె.జి.వి. సరిత ఐపీఎస్ పదవీ విరమణ పొందిన ఇద్దరు సిబ్బందిని శాలువాలతో సత్కరించి అభినందించారు. ఎం. శ్రీనివాసరావు సత్యనారాయణపురం పోలీస్ స్టేషన్‌లో ఏఎస్ఐగా, బెజవాడ ఏసోబు జగ్గయ్యపేటలో హెడ్ కానిస్టేబుల్‌గా విధులు నిర్వహించారు. ఈ సందర్భంగా డీసీపీ కె.జి.వి. సరిత మాట్లాడుతూ దాదాపు 30 నుంచి 35 సంవత్సరాల పాటు ప్రజలకు రక్షణగా నిలిచి సేవలందించడం గొప్ప విషయమన్నారు. పోలీస్ శాఖలో ఎన్నో సవాళ్లు, ఇబ్బందులు ఎదురైనా బాధితులకు న్యాయం, సహాయం అందించినప్పుడు కలిగే ఆత్మసంతృప్తి ఎంతో గొప్పదని పేర్కొన్నారు. పదవీ విరమణ పొందుతున్న అధికారులు, వారి కుటుంబ సభ్యులకు కృతజ్ఞతలు తెలిపారు. అనంతరం వారి కుటుంబ సభ్యులతో ఆత్మీయంగా మాట్లాడి యోగక్షేమాలు అడిగి తెలుసుకున్నారు. ఈ కార్యక్రమంలో వెల్ఫేర్ ఆర్‌ఐ శ్రీనివాసరావు, పోలీస్ అసోసియేషన్ అధ్యక్షుడు సోమయ్య, సీపీ కార్యాలయ పరిపాలనా విభాగ సిబ్బంది, పోలీస్ కుటుంబ సభ్యులు తదితరులు పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.