నెల్లూరు రూరల్ ఎంపీపీ పీఠం ఎవరికి?
నెల్లూరు రూరల్, మేజర్ న్యూస్ : నెల్లూరు రూరల్ మండల పరిషత్ అధ్యక్షురాలి (ఎంపీపీ) పీఠం ఎవరిని వరిస్తుందన్న ఉత్కంఠకు నేడు తెరపడనుంది. ఎంపీపీ పదవి ఎస్టీ మహిళకు రిజర్వ్ కావడంతో దొంతాలి, ఆమంచర్ల గ్రామాల మధ్య రాజకీయ ఆసక్తి నెలకొంది.మండలంలోని దొంతాలి ఎంపీటీసీగా చడమల స్వప్న, ఆమంచర్ల బిట్-1 ఎంపీటీసీగా యకసిరి లలిత ఎన్నికల్లో విజయం సాధించారు. దీంతో ఈ ఇద్దరిలో ఎవరికి ఎంపీపీ పదవి దక్కుతుందన్న అంశం ప్రస్తుతం మండల రాజకీయాల్లో హాట్ టాపిక్గా మారింది.ఒకవైపు దొంతాలి గ్రామం నుంచి చడమల స్వప్న, మరోవైపు ఆమంచర్ల గ్రామం నుంచి యకసిరి లలిత ఎంపీపీ పదవిని ఆశిస్తున్న నేపథ్యంలో పార్టీ అధిష్ఠానం ఎవరి వైపు మొగ్గు చూపుతుందోనని నాయకులు, కార్యకర్తలు ఆసక్తిగా ఎదురుచూస్తున్నారు.
నేడు ఎంపీపీ, వైస్ ఎంపీపీ ఎన్నిక
నెల్లూరు రూరల్ మండల ప్రజా పరిషత్ అధ్యక్షురాలు, ఉపాధ్యక్షుల ఎన్నికతో పాటు నూతనంగా ఎన్నికైన ఎంపీటీసీ సభ్యుల ప్రమాణ స్వీకార కార్యక్రమం గురువారం (నవంబర్ 19) నిర్వహించనున్నారు.మండల ప్రజా పరిషత్ అభివృద్ధి అధికారి కార్యాలయంలో ఉదయం 10 గంటలకు ఎన్నిక ప్రక్రియ ప్రారంభం కానుంది. తొలుత మండల కో-ఆప్షన్ సభ్యుని ఎన్నిక నిర్వహిస్తారు. అనంతరం మండలంలోని 12 ఎంపీటీసీ స్థానాలకు ఎన్నికైన సభ్యులతో ప్రమాణ స్వీకారం చేయించనున్నారు.ఆ తర్వాత చేతులెత్తే విధానంలో ఎంపీపీ ఎన్నిక నిర్వహించనున్నారు. తదనంతరం వైస్ ఎంపీపీ ఎన్నికతో పాటు నూతనంగా ఎన్నికైన అధ్యక్షురాలు, ఉపాధ్యక్షుల ప్రమాణ స్వీకారం జరగనుంది.ఎన్నిక ప్రక్రియకు సంబంధించి అన్ని ఏర్పాట్లు పూర్తి చేసినట్లు ప్రిసైడింగ్ అధికారి బి. శ్రీదేవి, ఎంపీడీవో వి. శైలేంద్ర కుమార్ తెలిపారు.