ఎమిరేట్స్ ఎయిర్లైన్స్ ఛైర్మన్ సంచలన వ్యాఖ్యలు
సూర్య బిజినెస్ డెస్క్: ప్రయాణికుల డిమాండ్ తగ్గడం కంటే విపరీతంగా పెరిగిన ఇంధన ధరలే తమ లాభాలపై తీవ్ర ప్రభావం చూపుతున్నాయని ఎమిరేట్స్ ఎయిర్లైన్స్ గ్రూప్ ఛైర్మన్ మరియు చీఫ్ ఎగ్జిక్యూటివ్ షేక్ అహ్మద్ బిన్ సయీద్ అల్ మక్తౌమ్ స్పష్టం చేశారు. అంతర్జాతీయ మార్కెట్లో జెట్ ఫ్యూయల్ ధరలు రెట్టింపు కావడం మరియు ప్రాంతీయ ఉద్రిక్తతల కారణంగా నిర్వహణ వ్యయం విపరీతంగా పెరిగినట్లు ఆయన వెల్లడించారు. కస్టమర్ల నుంచి డిమాండ్ మాత్రం పటిష్టంగానే ఉందని, అయితే విమానయాన ఇంధన ఖర్చులే ప్రధాన సమస్యగా మారాయని ఆయన పేర్కొన్నారు.
ప్రస్తుత ఆర్థిక సంవత్సరం తొలి ఆరు నెలలకు సంబంధించి ఎమిరేట్స్ గ్రూప్ తన ఆర్థిక ఫలితాలను వెల్లడించింది. ఈ కాలంలో గ్రూప్ మొత్తం ఆదాయం 12 శాతం క్షీణించి 66.2 బిలియన్ దిర్హామ్లకు (సుమారు 18 బిలియన్ డాలర్లు) చేరుకోగా, పన్నుకు ముందు లాభం 4.1 బిలియన్ దిర్హామ్లుగా (1.1 బిలియన్ డాలర్లు) నమోదైంది. గత ఏడాదితో పోలిస్తే లాభాలు దాదాపు 66 శాతం వరకు తగ్గినట్లు కంపెనీ తెలిపింది. అయితే ఈ క్లిష్ట పరిస్థితుల్లోనూ తమ కార్గో ఆపరేషన్స్ అత్యుత్తమ పనితీరు కనబరిచి ఆదాయాన్ని నిలకడగా ఉంచడంలో సహకరించాయని అల్ మక్తౌమ్ వివరించారు.
విమానయాన రంగంలో ఇంధన ఖర్చులదే సింహభాగం అని, ప్రస్తుతం ఎమిరేట్స్ ఆపరేటింగ్ ఖర్చులలో ఇంధనం వాటా ఏకంగా 34 శాతంగా ఉందని నివేదికలు స్పష్టం చేస్తున్నాయి. హెడ్జింగ్ ప్రయోజనాలు కొంత వెసులుబాటు కల్పించినప్పటికీ, అంతర్జాతీయంగా ఇంధన ధరల అస్థిరత విమానయాన సంస్థల లాభదాయకతను దెబ్బతీస్తోంది. ఏది ఏప్పటికీ భవిష్యత్తుపై తాము సానుకూల దృక్పథంతో ఉన్నామని, ప్రయాణికులకు మెరుగైన సేవలు అందించేందుకు నూతన విమానాల కొనుగోలు మరియు సాంకేతికతపై పెట్టుబడులను కొనసాగిస్తామని ఎమిరేట్స్ యాజమాన్యం స్పష్టం చేసింది.