నవంబర్ 1 న పోలింగ్ జరిగే ప్రాంతాల్లో సెలవు

కర్నూలు, అక్టోబర్ 27: స్థానిక సంస్థల ఎన్నికల నేపథ్యంలో నవంబర్ 1, 2026న పోలింగ్ జరిగే ప్రాంతాల్లోని ప్రభుత్వ కార్యాలయాలు, స్థానిక సంస్థలు, ప్రభుత్వ సంస్థలు, ప్రభుత్వ మరియు ప్రైవేట్ రంగ సంస్థలు, ఫర్మ్‌లకు స్థానిక సెలవు ప్రకటిస్తూ జిల్లా ఎన్నికల అధికారి/జిల్లా కలెక్టర్ డా.ఏ.సిరి ఆదేశాలు జారీ చేశారు…

ఈ మేరకు పోలింగ్ జరిగే ప్రాంతాల్లోని అన్ని ప్రభుత్వ కార్యాలయాలు, స్థానిక సంస్థలు, ఇతర ప్రభుత్వ సంస్థలకు నవంబర్ 1న స్థానిక సెలవు వర్తిస్తుందని కలెక్టర్ తెలిపారు. అదే విధంగా ప్రభుత్వ, ప్రైవేట్ రంగ సంస్థలు, ఫర్మ్‌లలో పనిచేస్తున్న ఉద్యోగులు తమ ఓటు హక్కును వినియోగించుకునేందుకు వీలుగా స్థానిక సెలవు ప్రకటించినట్లు కలెక్టర్ పేర్కొన్నారు. నెగోషియబుల్ ఇన్‌స్ట్రుమెంట్స్ యాక్ట్, 1981 ప్రకారం పోలింగ్ జరిగే ప్రాంతాల్లోనూ నవంబర్ 1న స్థానిక సెలవు వర్తిస్తుందని కలెక్టర్ స్పష్టం చేశారు. పోలింగ్ కేంద్రాలుగా గుర్తించిన ప్రభుత్వ భవనాలు, విద్యాసంస్థల భవనాలు, ఇతర భవనాలకు పోలింగ్‌కు ముందు రోజు, పోలింగ్ రోజు, ఓట్ల లెక్కింపు రోజున స్థానిక సెలవు వర్తిస్తుందని కలెక్టర్ తెలిపారు. ఎన్నికల ప్రక్రియ సజావుగా నిర్వహించడంతో పాటు అర్హులైన ఓటర్లందరూ తమ ఓటు హక్కును వినియోగించుకునేందుకు వీలుగా ఈ ఆదేశాలు జారీ చేసినట్లు కలెక్టర్ పేర్కొన్నారు..