బత్తలపల్లి మండలంలో నాలుగు ఎంపీటీసీ స్థానాలు ఏకగ్రీవం.. మిగతా స్థానాల్లో హోరాహోరీ పోరు!

స్థానిక సంస్థల ఎన్నికల పోరు బత్తలపల్లి మండలంలో వేడెక్కింది. నామినేషన్ల ఉపసంహరణ గడువు ముగియడంతో బత్తలపల్లి మండలంలో మొత్తం నాలుగు ఎంపీటీసీ స్థానాలు ఏకగ్రీవమైనట్లు తేలింది. డి. చెర్లోపల్లి ఎంపీటీసీ స్థానానికి సంబంధించి బీజేపీ అభ్యర్థి వెంకటేశ్వర రెడ్డి ఏకగ్రీవంగా ఎన్నికవ్వగా.. తంబాపురం నుంచి సాకే లక్ష్మీనారాయణ, మాల్యవంతం నుంచి నారాయణరెడ్డి, సంజీవపురం నుంచి చల్లా శ్రీనివాసులు తెలుగుదేశం పార్టీ తరఫున ఏకగ్రీవంగా ఎన్నికైనట్లు స్పష్టమైంది.మండలంలోని మిగిలిన స్థానాలకు సంబంధించి ప్రధాన పార్టీల మధ్య పోటీ రసవత్తరంగా మారింది. బత్తలపల్లి-1 స్థానానికి టీడీపీ తరఫున పోతక్క, వైఎస్సార్‌సీపీ తరఫున కాటమయ్య బరిలో నిలవగా.. పరుశురాము, వినయ్ కుమార్ స్వతంత్ర అభ్యర్థులుగా పోటీపడుతున్నారు. అలాగే ఈదుల ముష్టురు స్థానంలో టీడీపీ అభ్యర్థి సాకే మల్లక్క, వైఎస్సార్‌సీపీ అభ్యర్థి సాకే జయలక్ష్మిల మధ్య ప్రత్యక్ష పోరు నెలకొంది. ఓబులాపురం స్థానానికి టీడీపీ నుండి కప్పల నారప్ప, వైఎస్సార్‌సీపీ నుండి బ్యాల పెద్దయ్య పోటీ చేస్తుండగా.. దంపెట్ల స్థానంలో టీడీపీ అభ్యర్థి బాసికొండ దీపిక, వైఎస్సార్‌సీపీ అభ్యర్థి బొగ్గు సృజన తలపడుతున్నారు. బత్తలపల్లి-3 స్థానంలోనూ టీడీపీ అభ్యర్థి లక్ష్మీదేవి, వైఎస్సార్‌సీపీ అభ్యర్థి సుమతిల మధ్య నువ్వా నేనా అన్నట్లు పోటీ సాగుతోంది.

మరోవైపు కూటమి పొత్తుల్లో నెలకొన్న గందరగోళం నేపథ్యంలో కొన్ని స్థానాల్లో రాజకీయం ఊహించని మలుపు తిరిగింది. కూటమిలోని రెండు వేర్వేరు పార్టీల అభ్యర్థులకు ఒకే స్థానానికి సంబంధించి అధికారిక 'బి-ఫారాలు' అందడంతో ఆయా చోట్ల త్రిముఖ పోరు అనివార్యమైంది. బత్తలపల్లి-2 స్థానంలో టీడీపీ నుండి మౌనిక, వైఎస్సార్‌సీపీ నుండి శంషాద్‌తో పాటు బీజేపీ నుండి చిన్న పెద్దలు బరిలో నిలవగా.. అప్రాచెరువు ఎంపీటీసి స్థానంలో బీజేపీ నుండి వరిమడుగు చెన్నమ్మ, జనసేన నుండి వరిమడుగు ప్రభావతి ఇద్దరికీ బి-ఫారాలు రావడంతో పాటు, వైఎస్సార్‌సీపీ తరఫున శాంతమ్మ పోటీలో నిలిచారు. కూటమిలోని రెండు పార్టీలు ఒకే స్థానానికి బి-ఫారాలతో బరిలో దిగడం, మిగిలిన చోట్ల ప్రధాన పార్టీల మధ్య హోరాహోరీ పోరు సాగుతుండటంతో బత్తలపల్లి మండల రాజకీయాలు ఒక్కసారిగా వేడెక్కాయి.