నవభారత్ పాఠశాలలో ఘనంగా బాలల దినోత్సవ వేడుకలు..

అనంతపురం విద్య మేజర్ న్యూస్ :-భారత తొలి ప్రధానమంత్రి పండిట్ జవహర్‌లాల్ నెహ్రూ జయంతిని పురస్కరించుకుని అనంతపురంలోని నవభారత్ పాఠశాలలో బాలల దినోత్సవ వేడుకలను ఘనంగా నిర్వహించారు.  పాఠశాల కరస్పాండెంట్ నిట్టూరు శశిభూషణ్ జ్యోతి ప్రజ్వలన చేసి, నెహ్రూ చిత్రపటానికి పూలమాల వేసి వేడుకలను ప్రారంభించారు.
ఈ సందర్భంగా పాఠశాల ప్రధానోపాధ్యాయురాలు నిట్టూరు కృష్ణవేణి మాట్లాడుతూ విద్యార్థులు చదువుతో పాటు పెద్దలను గౌరవించడం, తల్లిదండ్రులు, గురువులు చెప్పే మంచి మాటలను ఆచరించడం అలవాటు చేసుకోవాలని సూచించారు. ప్రతిరోజూ క్రమం తప్పకుండా వ్యాయామం చేయడంతో పాటు పుస్తక పఠనానికి సమయం కేటాయించాలని తెలిపారు. నవభారత్ పాఠశాలలో విద్యతో పాటు క్రీడలు, సాంస్కృతిక కార్యక్రమాలు, విద్యార్థుల వ్యక్తిత్వ వికాసానికి ప్రత్యేక ప్రాధాన్యత ఇస్తున్నట్లు పేర్కొన్నారు.
అనంతరం విద్యార్థినీ విద్యార్థులు ఉత్సాహంగా పాటలకు నృత్యాలు ప్రదర్శించడంతో పాటు పలు సందేశాత్మక నాటికలతో ఆకట్టుకున్నారు. బాలల దినోత్సవాన్ని పురస్కరించుకుని నిర్వహించిన ఆటల పోటీలు, భగవద్గీత శ్లోకాల పోటీలు, దస్తూరి పోటీలలో ప్రతిభ కనబరిచి మొదటి, ద్వితీయ స్థానాలు సాధించిన విద్యార్థులకు బహుమతులు అందజేశారు. అనంతరం విద్యార్థులకు మిఠాయిలు పంపిణీ చేశారు. చివరిగా నిట్టూరు అనిత వందన సమర్పణ చేయడంతో కార్యక్రమం విజయవంతంగా ముగిసింది.

 మల్లికార్జున నేటి దినపత్రిక సూర్య స్టాఫ్ రిపోర్టర్..