telangana
107 ఏళ్ల వయసులో కన్నుమూసిన యూసుఫ్.. సర్జఖాన్‌పేటలో విషాదం
కోస్గి, మేజర్ న్యూస్: నారాయణపేట జిల్లా కోస్గి మండలం సర్జఖాన్‌పేట గ్రామానికి చెందిన మొహమ్మద్ యూసుఫ్ (107) శుక్రవారం కన్నుమూశారు. 1920లో జన్మించిన యూసుఫ్ శతాధిక వృద్ధుడిగా జీవితంలోని ఎన్నో కాలమాన మార్పులకు సాక్షిగా నిలిచారు. వందేళ్లకు పైగా జీవించడం అరుదైన విషయమని, ఆయన మృతి గ్రామానికి తీరని లోటని గ్రామస్తులు పేర్కొన్నారు. ఆయన మరణంతో సర్జఖాన్‌పేటలో విషాదఛాయలు అలుముకున్నాయి. యూసుఫ్ మృతి పట్ల కొడంగల్ మాజీ ఎమ్మెల్యే పట్నం నరేందర్ రెడ్డి సంతాపం వ్యక్తం చేసి నివాళులర్పించారు. మరోవైపు ముస్లిం మతపెద్దలు, బంధువులు, మిత్రులు కలిసి ముస్లింల స్మశానవాటిక వద్ద ప్రత్యేక ప్రార్థనలు నిర్వహించారు. అల్లాహ్ యూసుఫ్‌కు జన్నత్ ప్రసాదించాలని, ఆయన కుటుంబ సభ్యులకు మనోధైర్యం కల్పించాలని ప్రార్థించారు.
