కక్షలు వదిలేద్దాం.. గ్రామాల్లో శాంతిని కాపాడుకుందాం!.. వేమన ఫౌండేషన్ ఆధ్వర్యంలో శాంతి సందేశ కరపత్రాల ఆవిష్కరణ

అనంతపురం మేజర్ న్యూస్ ప్రతినిధి :-పంచాయతీ ఎన్నికల నేపథ్యంలో గ్రామాల్లో ఎలాంటి కక్షలు, విభేదాలు లేకుండా ఎన్నికలు ప్రశాంత వాతావరణంలో జరగాలని కోరుతూ వేమన ఫౌండేషన్ ఆధ్వర్యంలో శనివారం అనంతపురంలో శాంతి సందేశ కరపత్రాలను ఆవిష్కరించారు. ఎన్నికలు కేవలం ఒక్కరోజు మాత్రమే జరిగినప్పటికీ, వాటి కారణంగా ఏర్పడే పగలు, ప్రతీకారాలు, వర్గ విభేదాలు దీర్ఘకాలం కొనసాగుతాయని పేర్కొన్నారు.
ఎన్నికల సమయంలో ఏర్పడే గొడవలు కుటుంబాల మధ్య సంబంధాలను దెబ్బతీయడమే కాకుండా గ్రామాల అభివృద్ధికి కూడా ఆటంకంగా మారుతాయని తెలిపారు. రాజకీయ విభేదాలను పక్కనపెట్టి ప్రతి ఒక్కరూ సోదరభావంతో మెలగాలని, గ్రామాల్లో ప్రశాంత వాతావరణాన్ని కాపాడుకోవాలని పిలుపునిచ్చారు. భావితరాలకు మంచి భవిష్యత్తును అందించాలంటే శాంతియుత జీవనమే మార్గమని సూచించారు. కార్యక్రమంలో వేమన ఫౌండేషన్ అధ్యక్షులు ఆచార్య కాడా రామకృష్ణారెడ్డి, కార్యదర్శి డాక్టర్ అప్పిరెడ్డి హరినాథరెడ్డి, సభ్యులు రవీంద్రరాజు, మనోరంజన్ రెడ్డి, నాగశేషారెడ్డి తదితరులు పాల్గొన్నారు.

 మల్లికార్జున నేటి దినపత్రిక సూర్య స్టాఫ్ రిపోర్టర్..