సూర్య,కాగజ్‌నగర్: ఈ నెల 15న నల్లగొండ జిల్లా కేంద్రంలో నిర్వహించనున్న 36వ అఖిల భారత జాతీయ రైతు మహాసభలను విజయవంతం చేయాలని, చలో నల్లగొండ కార్యక్రమానికి కుమురం భీం ఆసిఫాబాద్ జిల్లా నుంచి రైతులు, వ్యవసాయ కార్మికులు పెద్ద సంఖ్యలో తరలిరావాలని జిల్లా రైతు సంఘం, వ్యవసాయ కార్మిక సంఘం నాయకులు పిలుపునిచ్చారు.ఈ సందర్భంగా కాగజ్‌నగర్ మండలం చింతగూడ గ్రామంలో మహాసభల ప్రచార పోస్టర్‌ను శనివారం విడుదల చేశారు. అనంతరం కాగజ్‌నగర్‌లో నిర్వహించిన విలేకరుల సమావేశంలో నాయకులు మాట్లాడుతూ రైతాంగ సమస్యలు, వ్యవసాయ రంగం ఎదుర్కొంటున్న సవాళ్లు, రైతుల హక్కుల పరిరక్షణ వంటి అంశాలపై మహాసభల్లో చర్చించనున్నట్లు తెలిపారు. జిల్లాలోని వివిధ మండలాలు, గ్రామాల నుంచి రైతులు ఐక్యంగా తరలివచ్చి సభలను విజయవంతం చేయాలని కోరారు.ఈ కార్యక్రమంలో జిల్లా రైతు సంఘం నాయకులు మాదారపు శ్రీనివాసరావు, వ్యవసాయ కార్మిక సంఘం జిల్లా నాయకులు బొర్కుట్ రాజేందర్, ఎన్‌పీఆర్‌డీ నాయకులు రాజేష్, రైతులు మల్లేష్, శ్రీధర్, బొజ్జ రాజు, నర్సు, లచ్చయ్య, నరసయ్య, పరశురాములు, భాస్కర్ తదితరులు పాల్గొన్నారు.
