మున్సిపల్ ఎన్నికల పోలింగ్ రోజున వేతనంతో కూడిన సెలవు
విజయవాడ మేజర్ న్యూస్ : జిల్లాలో నవంబర్ 1వ తేదీన మున్సిపల్ కార్పొరేషన్, మున్సిపాలిటీల సాధారణ ఎన్నికల పోలింగ్ నేపథ్యంలో ఎన్నికలు జరిగే ప్రాంతాల్లోని దుకాణాలు, వాణిజ్య, ప్రైవేటు సంస్థల్లో పనిచేసే ఉద్యోగులు, కార్మికులకు వేతనంతో కూడిన సెలవు ప్రకటించినట్లు జిల్లా కలెక్టర్ డాక్టర్ జి. లక్ష్మీశ తెలిపారు. ప్రభుత్వం జారీ చేసిన జీవో నంబర్ 1316 (మున్సిపల్ పరిపాలన, పట్టణాభివృద్ధి శాఖ), కార్మిక శాఖ సవరించిన ఆదేశాల మేరకు ఈ సెలవు వర్తిస్తుందని పేర్కొన్నారు. ఆంధ్రప్రదేశ్ దుకాణాలు, సంస్థల చట్టం–1988 నిబంధనల ప్రకారం ఎన్నికలు జరిగే ప్రాంతాల్లోని అన్ని దుకాణాలు, వాణిజ్య, ప్రైవేటు సంస్థల యాజమాన్యాలు తమ ఉద్యోగులు, కార్మికులకు వేతనంతో కూడిన సెలవు తప్పనిసరిగా కల్పించాలని స్పష్టం చేశారు. ఈ ఆదేశాలను యాజమాన్యాలన్నీ కచ్చితంగా అమలు చేయాలని, ఉల్లంఘించిన వారిపై చట్టప్రకారం చర్యలు తీసుకుంటామని హెచ్చరించారు. ప్రజాస్వామ్యంలో ఓటు హక్కు అత్యంత విలువైనదని, అర్హులైన ఓటర్లందరూ తమ ఓటు హక్కును బాధ్యతాయుతంగా వినియోగించుకోవాలని కలెక్టర్ విజ్ఞప్తి చేశారు.
స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.
