ములగ సాగుతో అదనపు ఆదాయం పొందాలి
రైతులకు సాగు విధానంపై అధికారుల అవగాహన
మెలియాపుట్టి. నవంబర్ 16. మేజర్ న్యూస్...
రైతులు వ్యవసాయంలో నూతన పద్ధతులను అనుసరిస్తూ ఆదాయ మార్గాలను పెంపొందించుకోవాలని ఉద్యానవన, గ్రామీణాభివృద్ధి శాఖల అధికారులు సూచించారు. ములగ సాగు ద్వారా అదనపు ఆదాయం పొందేందుకు ఉన్న అవకాశాలను రైతులకు వివరించారు. మెలియాపుట్టి మండలం బాణాపురం పంచాయతీ భగడ గ్రామంలో సోమవారం ములగ విత్తనాల నాటే విధానంపై రైతులకు అవగాహన కార్యక్రమం నిర్వహించారు.
ఈ సందర్భంగా అధికారులు క్షేత్రస్థాయిలో రైతులకు ములగ విత్తనాలు నాటే పద్ధతిని వివరించారు. మొక్కల మధ్య, వరుసల మధ్య నిర్ణీత దూరం ఉండేలా తాడుతో కొలతలు తీసుకోవాలని సూచించారు. నాటే సమయంలో తగిన జాగ్రత్తలు పాటిస్తే మొక్కలు ఆరోగ్యంగా పెరిగి, ఆశించిన దిగుబడి సాధించేందుకు అవకాశం ఉంటుందని తెలిపారు. మొక్కలకు గాలి, వెలుతురు సమృద్ధిగా అందేలా సరైన అంతరాన్ని పాటించడం అవసరమని వివరించారు.
వ్యవసాయంలో శాస్త్రీయ పద్ధతులను అనుసరించడం ద్వారా సాగు ఖర్చులను సమర్థంగా వినియోగించుకోవడంతో పాటు మెరుగైన ఫలితాలు పొందవచ్చని పేర్కొన్నారు. రైతులు ఉద్యాన పంటల సాగుపై అవగాహన పెంచుకుని, సంబంధిత శాఖల అధికారుల సలహాలు, సూచనలు పాటించాలని కోరారు.
కార్యక్రమంలో పీడీ (డీఆర్డీఏ) మురళి, ఉద్యానవన శాఖ అధికారి టీ. బాలరాజు, డీపీఎం శ్రీరాములు, ఏపీఎం త్రినాధమ్మ, ఫీల్డ్ అసిస్టెంట్, గ్రామ రైతులు పాల్గొన్నారు.