సంగాం శ్రీ సంగమేశ్వర స్వామి ఆలయానికి పోటెత్తిన భక్తులు
వంగర సూర్య: పవిత్ర కార్తీక మాసం మొదటి సోమవారం సందర్భంగా విజయనగరం జిల్లా, వంగర మండలం, సంగాం గ్రామంలో పూర్వము బలరామస్వామితో ప్రతిష్టించిన సంగాం శ్రీ సంగమేశ్వర స్వామి ఆలయం భక్తులతో కిటకిటలాడింది. తెల్లవారుజాము నుంచే పరిసర గ్రామాలతో పాటు, శ్రీకాకుళం ఒరిస్సా జిల్లా ప్రాంతాల నుండి కూడా భక్తులు భారీ సంఖ్యలో తరలిరావడంతో ఆలయ ప్రాంగణమంతా ఆధ్యాత్మిక శోభను సంతరించుకుంది.
సోమవారం వేకువజామునే భక్తులు త్రివేణి సంగమ తీరంలో (నాగావళి, సువర్ణముఖి, వేగావతి నదుల కలయిక ప్రాంతం) పవిత్ర స్నానాలు ఆచరించి, స్వామివారి దర్శనం కోసం క్యూలైన్లలో బారులు తీరారు. ఆలయ అర్చకులు స్వామివారికి తెల్లవారుజామున మహాన్యాస పూర్వక రుద్రాభిషేకం, బిల్వార్చన మరియు ప్రత్యేక పుష్పాలంకరణలు నిర్వహించారు.
మహిళలు ఆలయ ప్రాంగణంలో, నదీ తీరంలో కార్తీక దీపాలను వెలిగించి తమ మొక్కులు చెల్లించుకున్నారు. ఓం నమః శివాయ.హర హర మహాదేవ.అనే శివనామస్మరణతో సంగాం క్షేత్రం మార్మోగింది.
భక్తుల రద్దీని దృష్టిలో ఉంచుకుని ఆలయ కమిటీ సభ్యులు ప్రత్యేక క్యూలైన్లు, తాగునీటి సౌకర్యం కల్పించారు. ఎలాంటి అవాంఛనీయ సంఘటనలు జరగకుండా వంగర పోలీసులు పటిష్ట బందోబస్తు ఏర్పాటు చేశారు.
మధ్యాహ్నం వరకు భక్తుల తాకిడి కొనసాగగా, ఆలయ నిర్వాహకులు భక్తులకు తీర్థప్రసాదాలు అందజేశారు.