దుకాణాల అద్దె బకాయులు తక్షణమే చెల్లించాలి..
విజయనగరం సూర్య: నగరపాలక సంస్థ అధీనంలో ఉన్న దుకాణాల అద్దె బకాయిలను తక్షణమే చెల్లించాలని, లేకుంటే దుకాణాలను మూసివేయిస్తామని కమిషనర్ బాలస్వామి స్పష్టం చేశారు. ఆయన ఆదేశాలతో రెవెన్యూ ఇన్స్పెక్టర్లు, సిబ్బంది బృందాలుగా ఏర్పాటై అద్దె మరియు ఆస్తిపన్ను బకాయిలను రాబడుతున్నారు. మొండి బకాయిదారులకు రెడ్ నోటీసులు అందిస్తున్నారు. ఈ సందర్భంగా కమిషనర్ బాలస్వామి మాట్లాడుతూ నగరంలో ఆస్తి పన్నులు, కార్పొరేషన్ దుకాణాల అద్దెలను సకాలంలో చెల్లించి సంస్థకు సహకరించాల్సిందిగా కోరారు. అలాగే నీటి చార్జీలను కూడా చెల్లించాలన్నారు. ఇప్పటికే 7 కోట్ల 91 లక్షల మేర నీటి చార్జీలు బకాయిలు ఉన్నట్లు గణాంకాలు తెలియజేస్తున్నాయన్నారు. కావున నీటి వినియోగదారులు తక్షణమే నీటి చార్జీలను చెల్లించాలని చెప్పారు. లేదంటే కుళాయి కనెక్షన్లను తొలగించి వేస్తామని స్పష్టం చేశారు. దుకాణాల అద్దెలను వెంటనే చెల్లించాలని లేకుంటే రెడ్ నోటీసులు జారీ చేసి, తదుపరి దుకాణాలను మూసివేయిస్తామని వెల్లడించారు.