కవితా పఠనంతో సభను అలరించిన యువ కవి.. నీలం గేదెల..
శ్రీకాకుళం నవంబర్ 16 మేజర్ న్యూస్ :
సాహిత్య వేదికపై తన కవితా ప్రతిభతో యువ కవి నీలం గేదెల ప్రత్యేక గుర్తింపు పొందారు. శ్రీ శ్రీ కళా వేదిక ఆధ్వర్యంలో నిర్వహించిన 177వ జాతీయ శతాధిక కవి సమ్మేళనం ‘విజయనగర కవితా వైభవం’ కార్యక్రమంలో రాళ్లపాడు కాలనీకి చెందిన నీలం గేదెల తన కవితా పఠనంతో సభికులను ఆకట్టుకున్నారు.
ఈ సందర్భంగా ఆయన ‘విజయనగర ఉత్సవం’ అనే శీర్షికతో వినిపించిన కవిత విజయనగర చారిత్రక వైభవాన్ని, తెలుగు భాషా సాహిత్య సౌందర్యాన్ని ప్రతిబింబిస్తూ శ్రోతల ప్రశంసలు అందుకుంది. యువ కవిలోని సృజనాత్మకత, భావ వ్యక్తీకరణ ప్రతిభకు సభలోని ప్రముఖులు అభినందనలు తెలిపారు.
అనంతరం శ్రీ శ్రీ కళా వేదిక చైర్మన్ కత్తిమండ ప్రతాప్, ఎం.ఈ.ఓ డబ్బీర్ గోవిందరావు, జాతీయ ప్రణాళికా కార్యదర్శి, రిటైర్డ్ డీఈఓ టీ. పార్థసారథి, జాతీయ అధ్యక్షురాలు జి. ఈశ్వరి భూషణం, తెలుగు భాషా పరిరక్షణ సమితి సంచాలకులు, శ్రీ శ్రీ కళా వేదిక కన్వీనర్ సముద్రాల గురు ప్రసాద్ తదితర ప్రముఖులు యువ కవి నీలం గేదెలను ఘనంగా సత్కరించారు. జ్ఞాపిక, ప్రశంసాపత్రాన్ని అందజేసి ఆయన సాహిత్య ప్రతిభను అభినందించారు.
యువతలో తెలుగు భాష పట్ల ఆసక్తిని, సాహిత్య అభిరుచిని పెంపొందిస్తూ కవితా రంగంలో నీలం గేదెల మరిన్ని విజయాలు సాధించాలని పలువురు ఆకాంక్షించారు.