ముక్కామల జాతీయ రహదారి పనులను పరిశీలించిన జిల్లా కలెక్టర్..

అమలాపురం  మేజర్ న్యూస్ :అమలాపురం–ముక్కామల జాతీయ రహదారి పనుల్లో నాణ్యతా ప్రమాణాలు పాటించేలా ప్రత్యేక శ్రద్ధ వహించాలని జిల్లా కలెక్టర్ ఆర్. మహేష్ కుమార్ సంబంధిత అధికారులను ఆదేశించారు.గురువారం జిల్లా కలెక్టర్ అమలాపురం–ముక్కామల జాతీయ రహదారి పరిధిలోని సరళపల్లి రీవిట్మెంట్ వాల్ ఆనుకుని జరుగుతున్న రహదారి పనులను ఇరిగేషన్, జాతీయ రహదారులు, రోడ్లు–భవనాల శాఖల అధికారులతో కలిసి క్షేత్రస్థాయిలో పరిశీలించారు. రహదారి పనుల నాణ్యత, నిర్మాణ సామర్థ్యం, నీటి ప్రవాహం, వరదల సమయంలో నీటి ప్రవాహ వేగం వంటి అంశాలను అధికారులను అడిగి వివరాలు తెలుసుకున్నారు

.ఈ సందర్భంగా జిల్లా కలెక్టర్ మాట్లాడుతూ రహదారి నిర్మాణ పనుల్లో ఎటువంటి లోపాలకు తావు లేకుండా సంబంధిత అధికారులు నిరంతరం పర్యవేక్షించాలని సూచించారు. నిర్మాణ పనుల్లో నాణ్యతా ప్రమాణాలను తప్పనిసరిగా పాటిస్తూ, భవిష్యత్తులో సమస్యలు తలెత్తకుండా ముందస్తు చర్యలు చేపట్టాలని ఆదేశించారు.ముక్కామల–అమలాపురం జాతీయ రహదారి పరిధిలో నీటి ప్రవాహం వేగానికి గురయ్యే ప్రాంతాలను శాస్త్రీయంగా గుర్తించి, ఆయా ప్రాంతాల్లో రహదారి భద్రతకు అవసరమైన రక్షణ చర్యలను సత్వరమే చేపట్టాలని కలెక్టర్ అధికారులకు సూచించారు.

 రహదారి పనులపై ఇరిగేషన్, జాతీయ రహదారులు, రోడ్లు–భవనాల శాఖల అధికారులు పరస్పర సమన్వయంతో పనిచేయాలని తెలిపారు.ప్రస్తుత పనుల పరిస్థితిని సమగ్రంగా పరిశీలించి, అవసరమైన చోట్ల పటిష్టమైన రక్షణ చర్యలు చేపట్టడంతో పాటు, భవిష్యత్తులో ఇటువంటి లోపాలు పునరావృతం కాకుండా ముందస్తు ప్రణాళికతో పనులు నిర్వహించాలని జిల్లా కలెక్టర్ స్పష్టం చేశారు.ఈ పర్యటనలో ఆర్ అండ్ బి ఈ ఈ రాము, ఇరిగేషన్ ఏఈ వెంకటేశ్వరరావు నేషనల్ హైవే ఏఈ వెంకటరమణ    తదితరులు పాల్గొన్నారు