మేజర్ పంచాయతీ సర్పంచ్ బరిలో చింతు శకుంతల..
- బీజేపీ మద్దతుతో పోటీకి సన్నాహాలు..
- అవినీతి రహిత పాలన, అభివృద్ధే లక్ష్యమంటున్న చింతు పాపారావు
నరసన్నపేట నవంబర్ 16 మేజర్ న్యూస్ :
నరసన్నపేట మేజర్ గ్రామపంచాయతీ సర్పంచ్ ఎన్నికల బరిలో మాజీ జెడ్పీటీసీ సభ్యురాలు చింతు శకుంతల నిలిచేందుకు రంగం సిద్ధం చేసుకుంటున్నారు. బీజేపీ పార్టీ పెద్దల ఆశీస్సులతో సర్పంచ్ పదవికి పోటీ చేసేందుకు ఆమె సన్నద్ధమవుతున్నట్లు తెలుస్తోంది. ఈమె బీజేపీ జిల్లా ప్రధాన కార్యదర్శి చింతు పాపారావు సతీమణి కావడం విశేషం.
ఈ సందర్భంగా చింతు పాపారావు మాట్లాడుతూ కేంద్ర ప్రభుత్వం గ్రామీణ ప్రాంతాల అభివృద్ధికి కోట్లాది రూపాయల నిధులు మంజూరు చేస్తున్నప్పటికీ, క్షేత్రస్థాయిలో ఆశించిన స్థాయిలో అభివృద్ధి కనిపించడం లేదని అన్నారు. నరసన్నపేట మేజర్ పంచాయతీలో అవినీతికి తావులేని పారదర్శక పాలన అందించడమే తమ ప్రధాన లక్ష్యమని పేర్కొన్నారు. బీజేపీ మద్దతుతో పోటీ చేస్తున్న చింతు శకుంతలకు ప్రజలు తమ విలువైన ఓటుతో మద్దతు పలకాలని విజ్ఞప్తి చేశారు.
సర్పంచ్గా అవకాశం కల్పిస్తే నరసన్నపేట మేజర్ పంచాయతీలో నెలకొన్న సమస్యల పరిష్కారానికి ప్రాధాన్యతనిస్తూ సమగ్ర అభివృద్ధికి కృషి చేస్తామని తెలిపారు. పట్టణ సుందరీకరణ, చెరువుల అభివృద్ధి, ప్రభుత్వ ఆస్తుల పరిరక్షణ, మెరుగైన పారిశుధ్య నిర్వహణ, ప్రజలకు నిరంతర తాగునీటి సరఫరా వంటి అంశాలపై ప్రత్యేక దృష్టి సారిస్తామని చెప్పారు.
కేంద్ర, రాష్ట్ర ప్రభుత్వాల నుంచి అందే నిధులను సమర్థవంతంగా వినియోగించుకుని అభివృద్ధి కార్యక్రమాలు చేపడతామని, గ్రామపంచాయతీ ఆదాయ వనరులను పెంపొందించడం ద్వారా నరసన్నపేటను అభివృద్ధిలో అగ్రగామిగా నిలిపేందుకు కృషి చేస్తామని వెల్లడించారు.
ప్రజలు తమ ఓటు హక్కును సద్వినియోగం చేసుకుని అవినీతి రహిత పాలనకు, అభివృద్ధికి కట్టుబడి ఉన్న బీజేపీకి మద్దతు ఇవ్వాలని చింతు పాపారావు కోరారు.