మహాగణపతి ఉత్సవాల విజయానికి మీడియా సహకారం అభినందనీయం

మహాగణపతి ఉత్సవాల విజయానికి మీడియా సహకారం అభినందనీయం 

ఉత్సవాల విశేషాలను ప్రపంచవ్యాప్తంగా చాటిచెప్పారు 

మచిలీపట్నం అభివృద్ధిలో అందరూ భాగస్వాములు కావాలి

మచిలీపట్నం మహానగరంగా ఎదిగే అవకాశాలు 

ఉత్సవాల విజయానికి ప్రతి ఒక్కరి సహకారం అభినందనీయం 

రాష్ట్ర గనులు, భూగర్భవనరులు, ఎక్సైజ్ శాఖ మంత్రి కొల్లు రవీంద్ర

మచిలీపట్నం, అక్టోబర్ 4, మేజర్ న్యూస్ :ప్రతినిధి (ప్రేమ్ రాజ్✍️) : సాగర తీర మహాగణపతి మహోత్సవాలను విజయవంతంగా నిర్వహించడంలో ప్రింట్, ఎలక్ట్రానిక్, సామాజిక మాధ్యమాల ప్రతినిధులు అందించిన సహకారం ఎంతో అభినందనీయమని రాష్ట్ర గనులు, భూగర్భవనరులు, ఎక్సైజ్ శాఖ మంత్రి కొల్లు రవీంద్ర అన్నారు. మహాగణపతి ఉత్సవాల విశేషాలను ప్రపంచవ్యాప్తంగా ప్రజలకు చేరువ చేయడంలో మీడియా కీలక పాత్ర పోషించిందని పేర్కొన్నారు. ఉత్సవాల విజయాన్ని పురస్కరించుకుని ఆదివారం మచిలీపట్నంలోని సువర్ణ కళ్యాణ మండపంలో సాగర తీర మహాగణపతి ఉత్సవ కమిటీ ఆధ్వర్యంలో నిర్వహించిన పాత్రికేయుల ఆత్మీయ అభినందన సమావేశానికి మంత్రి ముఖ్యఅతిథిగా హాజరై మాట్లాడారు. ఉత్సవాలను ప్రజలంతా భాగస్వాములై విజయవంతం చేయడంలో మీడియా అందించిన సహకారానికి ధన్యవాదాలు తెలిపారు. ప్రింట్, ఎలక్ట్రానిక్ మీడియాతో పాటు సామాజిక మాధ్యమాల ద్వారా ఉత్సవాల విశేషాలు విస్తృతంగా ప్రజలకు చేరాయని, పలువురు వ్యక్తిగతంగా కార్యక్రమాలకు హాజరై వీడియోలు రూపొందించి ప్రచారం చేయడం అభినందనీయమన్నారు. మచిలీపట్నం అభివృద్ధి దిశగా ముందుకు సాగుతోందని, త్వరలో తీరానికి పోర్టు రానుండటం, ప్రతిష్టాత్మక గోవా షిప్‌యార్డ్ ప్రాజెక్టు ప్రతిపాదనలకు కేబినెట్ ఆమోదం లభించడం వంటి పరిణామాలు ప్రాంత అభివృద్ధికి దోహదపడతాయని తెలిపారు. సుమారు రూ.8 వేల కోట్ల పెట్టుబడులతో పాటు వేలాది మందికి ఉపాధి అవకాశాలు కల్పించే ప్రాజెక్టులపై ముందడుగు పడుతోందన్నారు. మచిలీపట్నం భవిష్యత్తులో మహానగరంగా అభివృద్ధి చెందేందుకు అవకాశాలు ఉన్నాయని, ప్రజలు, వ్యాపార వర్గాలు, వివిధ సంస్థలు ‘ఇది మన నగరం.. మన బాధ్యత’ అనే భావనతో అభివృద్ధిలో భాగస్వాములు కావాలని పిలుపునిచ్చారు. ఉత్సవాల నిర్వహణలో కమిటీ సభ్యులు, అధికారులు, వివిధ వర్గాల ప్రజలు అందించిన సహకారాన్ని అభినందించిన మంత్రి, వినూత్న లైటింగ్, అలంకరణలు, కార్పెట్ తదితర ఏర్పాట్లు ప్రత్యేక ఆకర్షణగా నిలిచాయని తెలిపారు. ఉత్సవాల విజయానికి సహకరించిన ప్రతి ఒక్కరికీ కృతజ్ఞతలు తెలుపుతూ, ఇకపై కూడా మచిలీపట్నం అభివృద్ధి కోసం సమష్టిగా పనిచేయాలని సూచించారు. కార్యక్రమంలో సాగర తీర మహాగణపతి ఉత్సవ కమిటీ చైర్మన్ చలమలశెట్టి నరసింహారావు, జిల్లా సహకార మార్కెటింగ్ సొసైటీ చైర్మన్ బండి రామకృష్ణ, జిల్లా సమాచార పౌర సంబంధాల అధికారి పి. జయరావు, మాజీ మున్సిపల్ చైర్మన్ మోటమర్రి బాబా ప్రసాద్, కమిటీ సభ్యులు, ప్రింట్, ఎలక్ట్రానిక్, సామాజిక మాధ్యమాల ప్రతినిధులు పాల్గొన్నారు.