మద్ది గ్రామంలో పోలీసుల భారీ ఫ్లాగ్ మార్చ్

ప్రశాంత ఎన్నికలే లక్ష్యంగా పోలీస్ శాఖ కవాతు

ధైర్యంగా ఓటేయండి అంటూ ప్రజలకు భరోసా

సిపి ఆదేశాల మేరకు కవాతు: సిఐ చంద్రమౌళి వెల్లడి

పద్మనాభం, మేజర్ న్యూస్ : రాబోయే ఎంపీటీసీ, జడ్పీటీసీ ఎన్నికల నేపథ్యంలో పద్మనాభం పోలీసులు అప్రమత్తమయ్యారు. విశాఖపట్నం పోలీస్ కమిషనర్ డా. శంకబ్రత బాగ్చి, డీసీపీ-1 మణికంఠ ఆదేశాల మేరకు ఈరోజు సాయంత్రం పద్మనాభం పోలీస్ స్టేషన్ పరిధిలోని మద్ది గ్రామంలో భారీ ఫ్లాగ్ మార్చ్ నిర్వహించినట్లు పద్మనాభం సర్కిల్ ఇన్స్పెక్టర్ చంద్రమౌళి తెలిపారు. నార్త్ సబ్ డివిజన్ ఏసిపి అప్పలరాజు  పర్యవేక్షణలో, పద్మనాభం సర్కిల్ ఇన్స్పెక్టర్ చంద్రమౌళి ఆధ్వర్యంలో నార్త్ సబ్-డివిజన్ పోలీసు సిబ్బందితో ఈ ఫ్లాగ్ మార్చ్ నిర్వహించారు. గ్రామంలోని ప్రధాన వీధుల్లో పోలీసులు కవాతు చేస్తూ ప్రజల్లో భద్రతా భావాన్ని నింపారు.
ఎన్నికలు ప్రశాంత వాతావరణంలో జరిగేలా పోలీసు శాఖ అన్ని చర్యలు తీసుకుంటోందని, ప్రజలు ఎలాంటి భయం లేకుండా ఓటు వేయవచ్చని భరోసా కల్పించారు. ఓటర్లు ఎలాంటి ప్రలోభాలకు లొంగవద్దని, ఎవరి ఒత్తిడికి, బెదిరింపులకు భయపడవద్దని, స్వేచ్ఛగా, నిర్భయంగా తమ ఓటు హక్కును వినియోగించుకోవాలని సూచించారు. ఎన్నికల సమయంలో శాంతిభద్రతలకు విఘాతం కలిగించే వారిపై చట్టప్రకారం కఠిన చర్యలు తీసుకుంటామని హెచ్చరించారు.