మాల, మాదిగలకు రాజ్యాధికారంలో భాగస్వామ్యం లేదా?

మున్సిపల్ రిజర్వేషన్లలో ఎస్సీ స్థానాలు లేకపోవడంపై మాల మహానాడు నేత జేష్టాది భాస్కర్ ఆగ్రహం!

ప్రొద్దుటూరు అర్బన్ మేజర్ న్యూస్:

అట్టడుగు వర్గాలను ఆదుకుంటున్నామని, అభివృద్ధి పథంలో నడిపిస్తున్నామని చెబుతున్న ప్రభుత్వాలు, రాజ్యాధికారంలో భాగస్వామ్యం కల్పించే విషయంలో మాత్రం మాల, మాదిగ సామాజిక వర్గాలకు తగిన ప్రాధాన్యత ఇస్తున్నాయా? అంటూ మాల మహానాడు చెన్నయ్య వర్గం కడప జిల్లా అధ్యక్షుడు జేష్టాది భాస్కర్ ప్రశ్నించారు. కడప జిల్లాలో మున్సిపాలిటీ ఎన్నికలకు సంబంధించి ప్రకటించిన రిజర్వేషన్ల ప్రక్రియలో ఒక్క ఎస్సీ స్థానం కూడా లేకపోవడం పట్ల ఆయన తీవ్ర అభ్యంతరం వ్యక్తం చేశారు. ఈ పరిణామం ఎస్సీ వర్గాలకు రాజకీయ ప్రాతినిధ్యం కల్పించే అంశంపై పలు ప్రశ్నలను లేవనెత్తుతోందని పేర్కొన్నారు. సామాజికంగా, ఆర్థికంగా వెనుకబడిన వర్గాలను అభివృద్ధి చేయడమే లక్ష్యమని ప్రకటించే ప్రభుత్వాలు, రాజకీయ అధికారంలోనూ వారికి తగిన అవకాశాలు కల్పించాలని భాస్కర్ డిమాండ్ చేశారు. అభివృద్ధి పథకాలు అందించడం మాత్రమే కాకుండా, నిర్ణయాధికార వ్యవస్థల్లోనూ అట్టడుగు వర్గాలకు సముచిత స్థానం కల్పించాల్సిన అవసరం ఉందన్నారు. మాల, మాదిగ వర్గాలకు రాజకీయ ప్రాతినిధ్యం కల్పించే విషయంలో నిర్లక్ష్యం జరుగుతోందన్న భావన కలగకుండా ప్రభుత్వం చర్యలు తీసుకోవాలని ఆయన కోరారు. మున్సిపల్ రిజర్వేషన్ల అంశాన్ని పునఃపరిశీలించి, నిబంధనలకు అనుగుణంగా సామాజిక న్యాయం జరిగేలా చూడాలని విజ్ఞప్తి చేశారు. ఎస్సీ వర్గాలకు రాజకీయ ప్రాతినిధ్యం కల్పించే అంశంపై ప్రభుత్వం స్పష్టత ఇవ్వాలని జేష్టాది భాస్కర్ డిమాండ్ చేశారు.

• ఎ ప్రతాప్ కుమార్ ప్రొద్దుటూరు అర్బన్ వైఎస్సార్ కడప జిల్లా