మాచవరంలో ప్రమాదకరంగా ఒరిగిన విద్యుత్ స్తంభం: భయాందోళనలో గ్రామస్తులు, తక్షణమే తొలగించాలని విజ్ఞప్తి!
డాక్టర్ బిఆర్ అంబేద్కర్ కోనసీమ జిల్లా అంబాజీపేట మేజర్ న్యూస్ : డాక్టర్ బి.ఆర్. అంబేద్కర్ కోనసీమ జిల్లా అంబాజీపేట మండల పరిధిలోని మాచవరం గ్రామ శివారు జక్కంశెట్టివారిపాలెంలో విద్యుత్ స్తంభం ఒకటి ప్రమాదకరంగా పక్కకు ఒరిగిపోయింది. ఏ క్షణంలోనైనా కూలిపోయే స్థితిలో ఉన్న ఈ స్తంభాన్ని చూసి స్థానికులు తీవ్ర భయాందోళనలు వ్యక్తం చేస్తున్నారు.
ఒరిగిన స్తంభంపై నుంచి హై-వోల్టేజ్ విద్యుత్ తీగలు వెళుతుండటంతో పాటు చుట్టూ పిచ్చి మొక్కలు, చెట్లు దట్టంగా అల్లుకుపోయాయి. ఈ మార్గం గుండా నిత్యం రాకపోకలు సాగించే రైతులు, విద్యార్థులు, బాటసారులు ప్రాణాలు అరచేతిలో పెట్టుకుని ప్రయాణించాల్సిన దుస్థితి నెలకొంది.
ఈదురుగాలులు, వర్షాలు వస్తే స్తంభం పూర్తిగా నేలకూలి పెను ప్రమాదం సంభవించే ముప్పు ఉందని స్థానికులు హెచ్చరిస్తున్నారు. ఎలాంటి ప్రాణ, ఆస్తి నష్టం జరగకముందే విద్యుత్ శాఖ అధికారులు తక్షణమే స్పందించి, ప్రమాదకరంగా మారిన స్తంభాన్ని తొలగించి నూతన స్తంభాన్ని ఏర్పాటు చేయాలని గ్రామస్తులు కోరుతున్నారు.
