కోటవురట్లకు ఎన్నికల డ్యూటీకి వచ్చిన కమెడియన్ సత్తిపండు!

ఎస్.రాయవరం, నవంబర్ 4, మేజర్ న్యూస్:
ఎన్నికల విధుల నిర్వహణలో ఓ ఆసక్తికర సన్నివేశం చోటుచేసుకుంది. ప్రముఖ కమెడియన్ గా సుపరిచితులైన సత్తిపండు ఎన్నికల డ్యూటీకి కోటవురట్ల మండలానికి వచ్చారు. వివరాల్లోకి వెళితే... సత్తిపండు ప్రస్తుతం పాయకరావుపేట మండలం, గోపాలపట్నం యూపీ స్కూల్ లో స్కూల్ అసిస్టెంట్ గా విధులు నిర్వహిస్తున్నారు. ఎన్నికల విధుల్లో భాగంగా ఆయనకు పీఓ (ప్రిసైడింగ్ ఆఫీసర్) గా బాధ్యతలు అప్పగించారు. జల్లారులో విధులు నిర్వహించేందుకు బ్యాలెట్ బాక్స్ ను తీసుకుని ఆయన విధులకు బయలుదేరారు.

ఈ సందర్భంగా సత్తిపండు మాట్లాడుతూ, తన ఉద్యోగ జీవితం కోటవురట్ల మండలంలోనే మొదలైందని గుర్తు చేసుకున్నారు. తన మొదటి అపాయింట్మెంట్ కోటవురట్ల మండలంలోనే వచ్చిందని, ఆ తర్వాత నీలిగుంట, అల్లుమియాపాలెం ఎంపీపీ స్కూళ్లలో టీచర్ గా పని చేశానని తెలిపారు. చాలా కాలం తర్వాత మళ్లీ అదే మండలానికి ఎన్నికల విధుల నిమిత్తం రావడం సంతోషంగా ఉందన్నారు. టీచర్ గా విధులు నిర్వహిస్తూనే కమెడియన్ గా కూడా తనకంటూ ప్రత్యేక గుర్తింపు తెచ్చుకున్న సత్తిపండు ఎన్నికల డ్యూటీలో కనిపించడంతో స్థానికంగా ఆసక్తి నెలకొంది.