కాంట్రాక్ట్‌ ఉద్యోగులను రెగ్యులరైజ్‌ చేయాలి
మార్కాపురం కలెక్టరేట్‌ వద్ద ఎంహెచ్‌ కాంట్రాక్ట్‌ ఉద్యోగుల నిరసన
100 శాతం గ్రాస్‌ జీతాన్ని పునరుద్ధరించాలని డిమాండ్‌
మార్కాపురం మేజర్ న్యూస్
వైద్య ఆరోగ్యశాఖలో ఏళ్ల తరబడి కాంట్రాక్ట్‌ పద్ధతిలో పనిచేస్తున్న ఉద్యోగులను రెగ్యులరైజ్‌ చేయాలని ఏపీ మెడికల్‌ అండ్‌ హెల్త్‌ కాంట్రాక్ట్‌ ఎంప్లాయీస్‌ జేఏసీ డిమాండ్‌ చేసింది. తమ న్యాయమైన సమస్యలను ప్రభుత్వం వెంటనే పరిష్కరించాలని కోరుతూ సోమవారం మార్కాపురం కలెక్టరేట్‌ వద్ద కాంట్రాక్ట్‌ ఉద్యోగులు నిరసన చేపట్టారు.
ఈ సందర్భంగా ఉద్యోగులు మాట్లాడుతూ.. వైద్య ఆరోగ్యశాఖలో వివిధ విభాగాల్లో కాంట్రాక్ట్‌ ఉద్యోగులుగా ఎన్నో సంవత్సరాలుగా సేవలందిస్తున్నామని తెలిపారు. ప్రభుత్వ ఆసుపత్రులు, వైద్య ఆరోగ్య కేంద్రాల్లో ప్రజలకు వైద్య సేవలు అందించడంలో కాంట్రాక్ట్‌ ఉద్యోగులు కీలకపాత్ర పోషిస్తున్నప్పటికీ, తమ ఉద్యోగ భద్రతపై ప్రభుత్వం స్పష్టమైన నిర్ణయం తీసుకోవడం లేదని ఆవేదన వ్యక్తం చేశారు.
కాంట్రాక్ట్‌ ఉద్యోగుల సమస్యలను పరిష్కరించడంతో పాటు వారిని రెగ్యులరైజ్‌ చేయాలని వారు డిమాండ్‌ చేశారు. అలాగే 100 శాతం గ్రాస్‌ జీతాన్ని పునరుద్ధరించాలని ప్రభుత్వాన్ని కోరారు. 2018 సంవత్సరం నుంచి అమలవుతున్న వేతన తగ్గింపు కారణంగా ఉద్యోగులు ఆర్థికంగా ఇబ్బందులు ఎదుర్కొంటున్నారని, ఈ అంశాన్ని ప్రభుత్వం సమీక్షించి న్యాయం చేయాలని విజ్ఞప్తి చేశారు.ఏళ్ల తరబడి సేవలందిస్తున్న కాంట్రాక్ట్‌ ఉద్యోగుల కుటుంబాల పరిస్థితిని దృష్టిలో ఉంచుకుని ప్రభుత్వం సానుకూలంగా స్పందించాలని, ఉద్యోగ భద్రత కల్పించేలా చర్యలు తీసుకోవాలని జేఏసీ నాయకులు కోరారు. సమస్యలను పరిష్కరించకపోతే భవిష్యత్‌లో ఉద్యమాన్ని మరింత ఉధృతం చేస్తామని వారు హెచ్చరించారు.
