కళ్యాణదుర్గం ఎక్సైజ్ పోలీస్ స్టేషన్లో వాహనాలు వేలం, కర్ణాటక మద్యం నాటుసార ధ్వంసం.
కళ్యాణదుర్గం: అక్రమ మద్యం విక్రయాలు, రవాణాపై చర్యల్లో భాగంగా ప్రొహిబిషన్ అండ్ ఎక్సైజ్ శాఖ అధికారులు నాలుగు వాహనాలను వేలం వేసి, వివిధ కేసుల్లో స్వాధీనం చేసుకున్న మద్యం, నాటుసారాను ధ్వంసం చేశారు. అనంతపురం ప్రొహిబిషన్ అండ్ ఎక్సైజ్ సూపరింటెండెంట్ బి. రామ్ మోహన్ రెడ్డి ఆదేశాల మేరకు, అసిస్టెంట్ ప్రొహిబిషన్ అండ్ ఎక్సైజ్ సూపరింటెండెంట్ పర్యవేక్షణలో ఈ కార్యక్రమం నిర్వహించారు. కళ్యాణదుర్గం ఎక్సైజ్ స్టేషన్ పరిధిలో పట్టుబడిన నాలుగు వాహనాలకు ప్రభుత్వం నిర్ణయించిన కనీస ధర రూ.52,000 కాగా, వేలంపాటలో రూ.53,300 ధర పలికింది. దీనికి రూ.9,594 జీఎస్టీ కలిపి మొత్తం రూ.62,894 ప్రభుత్వానికి ఆదాయంగా సమకూరింది. అదేవిధంగా వివిధ ఎక్సైజ్ కేసుల్లో స్వాధీనం చేసుకున్న 75.69 లీటర్ల కర్ణాటక మద్యం, ఐదు కేసుల్లో పట్టుబడిన 7.56 లీటర్ల ఆంధ్ర మద్యం, మరో ఐదు కేసుల్లో స్వాధీనం చేసుకున్న 48.52 లీటర్ల నాటుసారాను అధికారులు నిబంధనల ప్రకారం ధ్వంసం చేశారు. ఈ కార్యక్రమంలో డీటీఎఫ్ ప్రొహిబిషన్ అండ్ ఎక్సైజ్ ఇన్స్పెక్టర్ జయనాథ్ రెడ్డి, కళ్యాణదుర్గం ఎక్సైజ్ ఇన్స్పెక్టర్ డి. సోమశేఖర్, సబ్ఇన్స్పెక్టర్ ఎన్. పోలక్క, హెడ్ కానిస్టేబుల్ ఇమ్రాన్, కానిస్టేబుళ్లు నరసరాజు, ప్రతాప్ తదితర సిబ్బంది పాల్గొన్నారు.
కళ్యాణదుర్గం టౌన్ రిపోర్టర్ :- బోయ రంగస్వామి.