జడ్పిటిసి ఎన్నికలకు సర్వం సిద్ధం.. 15 పోలింగ్ కేంద్రాలు ఏర్పాటు.. 10782 మంది తమ ఓటు హక్కును వినియోగించుకోనున్న ఓటర్లు

పులివెందుల, మేజర్ న్యూస్:

పులివెందుల మండలంలో గురువారం జరగనున్న జడ్పీటీసీ ఎన్నికలకు ఎన్నికల అధికారులు సర్వం సిద్ధం చేశారు. మండల పరిధిలో మొత్తం 15 పోలింగ్ కేంద్రాలను ఏర్పాటు చేసినట్లు అధికారులు తెలిపారు. ఎన్నికలు ప్రశాంత వాతావరణంలో నిర్వహించేందుకు అవసరమైన ఏర్పాట్లు పూర్తి చేసినట్లు వెల్లడించారు.
మండల పరిధిలోని అచ్చ వెళ్లి 2, రాగి మానిపల్లె 1, ఎర్రబల్లెలో 1, కన్నంపల్లిలో 2, మోట్నూతలపల్లె 1, కొత్తపల్లెలో 2, ఎర్రబెల్లిలో 2, నల్లపురెడ్డిపల్లెలో 3, నల్గొండవారిపల్లెలో 1 పోలింగ్ కేంద్రాన్ని ఏర్పాటు చేశారు.
ఈ ఎన్నికల్లో మొత్తం 10,782 మంది ఓటర్లు తమ ఓటు హక్కును వినియోగించుకోనున్నారు. వీరిలో 5,170 మంది పురుషులు, 5,612 మంది మహిళా ఓటర్లు ఉన్నట్లు అధికారులు వెల్లడించారు.
పోలింగ్ కేంద్రాల వద్ద ఎలాంటి అవాంఛనీయ సంఘటనలు చోటుచేసుకోకుండా ముందస్తు జాగ్రత్తగా పోలీసు బందోబస్తు ఏర్పాటు చేశారు. ఎన్నికలు ప్రశాంతంగా, పారదర్శకంగా జరిగేలా అన్ని చర్యలు తీసుకున్నట్లు అధికారులు తెలిపారు. ప్రతి ఓటరూ స్వచ్ఛందంగా పోలింగ్‌లో పాల్గొని తమ అమూల్యమైన ఓటు హక్కును వినియోగించుకోవాలని ఎన్నికల అధికారులు విజ్ఞప్తి చేశారు.

పి కృష్ణ. పులివెందుల స్టాప్ రిపోర్టర్ కడప జిల్లా