జడ్పీటీసీ, ఎంపీటీసీ నామినేషన్లపై కలెక్టర్ పర్యవేక్షణ

ఎన్నికల నిబంధనలు పక్కాగా అమలు చేయాలి

సూర్య ప్రతినిధి, ఒంగోలు : 

 జడ్పీటీసీ, ఎంపీటీసీ ఎన్నికల నామినేషన్ ప్రక్రియను జిల్లా కలెక్టర్ పి. రాజబాబు శుక్రవారం పర్యవేక్షించారు. కలెక్టర్ కార్యాలయంలోని సమావేశ మందిరం నుంచి జాయింట్ కలెక్టర్ శ్రీమతి కల్పనా కుమారితో కలిసి వెబ్‌కాస్టింగ్ ద్వారా వివిధ ప్రాంతాల్లో జరుగుతున్న నామినేషన్ల స్వీకరణ ప్రక్రియను పరిశీలించారు. ఈ సందర్భంగా రిటర్నింగ్ అధికారులతో మాట్లాడిన కలెక్టర్ నామినేషన్ ప్రక్రియను ఎన్నికల ప్రవర్తన నియమావళికి అనుగుణంగా పకడ్బందీగా నిర్వహించాలని సూచించారు. జె. పంగులూరు, లింగసముద్రం తదితర మండలాల రిటర్నింగ్ అధికారులతో మాట్లాడి నామినేషన్ల స్వీకరణకు సంబంధించిన వివరాలను అడిగి తెలుసుకున్నారు. ఎన్నికల నియమావళి ప్రకారం నామినేషన్ కేంద్రాల్లో అభ్యర్థులను అనుమతించాలని, ఎన్నికల ప్రవర్తన నియమావళిని ప్రతి ఒక్కరూ తప్పనిసరిగా పాటించేలా చర్యలు తీసుకోవాలని ఆదేశించారు. నామినేషన్ కేంద్రం నుంచి వంద మీటర్ల పరిధిలో అమలులో ఉన్న నిబంధనలను తూచా తప్పకుండా పాటించాలని సూచించారు. నామినేషన్ల స్వీకరణ ప్రక్రియలో ఎలాంటి అలసత్వానికి తావివ్వకుండా అప్రమత్తంగా వ్యవహరించాలని రిటర్నింగ్ అధికారులకు కలెక్టర్ పి. రాజబాబు సూచించారు.