హైదరాబాద్‌లో తాగునీటి సమస్యలపై జలమండలి ఎండీ అశోక్ రెడ్డికి బీజేపీ వినతిపత్రం
జూబ్లిహిల్స్, మేజర్ న్యూస్: గ్రేటర్ హైదరాబాద్ పరిధిలోని పలు ప్రాంతాల్లో నెలకొన్న కలుషిత నీటి సరఫరా మరియు తాగునీటి ఎద్దడి సమస్యలను తక్షణమే పరిష్కరించాలని డిమాండ్ చేస్తూ భారతీయ జనతా పార్టీ నాయకులు జలమండలి అధికారులకు వినతిపత్రం సమర్పించారు. హైదరాబాద్ సెంట్రల్ జిల్లా అధ్యక్షులు లంకల దీపక్ రెడ్డి నాయకత్వంలో బీజేపీ ప్రతినిధి బృందం ఖైరతాబాద్‌లోని జలమండలి ప్రధాన కార్యాలయంలో ఎండి కె. అశోక్ రెడ్డి ని కలసి సమస్యలతో కూడిన వినతిపత్రాన్ని అందజేశారు. ప్రముఖ నేతల భాగస్వామ్యం- ఈ కార్యక్రమంలో బీజేపీ తెలంగాణ రాష్ట్ర ప్రధాన కార్యదర్శి ఎన్. గౌతమ్ రావ్, ఖైరతాబాద్ మాజీ ఎమ్మెల్యే చింతల రాంచంద్రారెడ్డి, గోషామహల్ మాజీ ఎమ్మెల్యే ప్రేమ్‌సింగ్ రాథోడ్, ఓబీసీ మోర్చా రాష్ట్ర అధ్యక్షులు ఆనంద్ గౌడ్ ముఖ్య అతిథులుగా హాజరయ్యారు. వారితో పాటు హైదరాబాద్ సెంట్రల్ జిల్లా ప్రధాన కార్యదర్శులు ప్రేమ్‌కుమార్, వెంకటస్వామి, అజయ్, జిల్లా కార్యవర్గ సభ్యులు, వివిధ మోర్చాల జిల్లా అధ్యక్షులు మరియు ముఖ్య నాయకులు పెద్ద సంఖ్యలో పాల్గొన్నారు.
సమస్యల తక్షణ పరిష్కారానికి డిమాండ్ ; నగరంలో అనేక డివిజన్లలో మంచి నీటి పైప్‌లైన్లలోకి మురుగునీరు చేరుతుండటం వల్ల ప్రజలు తీవ్ర ఇబ్బందులు ఎదుర్కొంటున్నారని, రోగాల బారిన పడుతున్నారని బీజేపీ నేతలు జలమండలి ఎండీ దృష్టికి తీసుకెళ్లారు. కలుషిత నీటి సమస్య తీవ్రంగా ఉన్న ప్రాంతాల్లో తక్షణమే లీకేజీలను అరికట్టాలని, ప్రజలకు స్వచ్ఛమైన తాగునీటిని అందించేలా చర్యలు తీసుకోవాలని స్పష్టం చేశారు. స్పందించిన జలమండలి ఎండీ అశోక్ రెడ్డి సమస్యలపై తగు చర్యలు తీసుకుంటామని హామీ ఇచ్చారు.
