ఎమ్మెల్సీ ఎన్నికలకు సిద్ధమవ్వాలి

హైదరాబాద:తెలంగాణ ప్రదేశ్ కాంగ్రెస్ కమిటీ (టీపీసీసీ) ఆధ్వర్యంలో పార్టీ కీలక సమావేశం జరిగింది. ఈ సమావేశానికి ముఖ్యమంత్రి ఎనుముల రేవంత్ రెడ్డి, ఉప ముఖ్యమంత్రి భట్టి విక్రమార్క, టీపీసీసీ అధ్యక్షుడు మహేష్ కుమార్ గౌడ్, పలువురు మంత్రులు, ఎమ్మెల్యేలు, ఎమ్మెల్సీలు మరియు ఎంపీలు హాజరయ్యారు.

సమావేశంలో రానున్న 6 ఉమ్మడి జిల్లాల ఎమ్మెల్సీ ఎన్నికల వ్యూహాలు, ఓటర్ల నమోదు, ఎల్‌నినో ప్రభావం మరియు మౌలిక అంశాలపై సీఎం రేవంత్ రెడ్డి పార్టీ శ్రేణులకు దిశానిర్దేశం చేశారు.

మోడీ రాజకీయ లబ్ధి కోసమే SIR:

సమావేశంలో సీఎం రేవంత్ రెడ్డి మాట్లాడుతూ ప్రధాని నరేంద్ర మోడీపై తీవ్ర స్థాయిలో విమర్శలు గుప్పించారు. "గతంలో ప్రజల్లో ఓటు హక్కుపై అవగాహన కల్పించేందుకు ఎస్‌ఐఆర్‌ (SIR) ప్రక్రియను తీసుకువచ్చారు. కానీ, ప్రధాని మోడీ తన సొంత రాజకీయ స్వార్థం కోసం ఎస్‌ఐఆర్‌ను వాడుకుంటున్నారు. ఎస్‌ఐఆర్ పేరుతో పేదల రాజ్యాంగబద్ధమైన హక్కులను కాలరాస్తూ, దాని ద్వారా రాజకీయ లబ్ధి పొందాలని చూస్తున్నారు" అని సీఎం ఆరోపించారు.

రెట్టింపు ఉత్సాహంతో ముందడుగు:

కాంగ్రెస్ పార్టీ చరిత్రను గుర్తుచేస్తూ, "కాంగ్రెస్‌కు ప్రభుత్వాలను ఏర్పాటు చేయడం కొత్తేమీ కాదు. కొన్నిసార్లు ఎన్నికల్లో ఓటమి ఎదురైనా, మేము ఎప్పుడూ రెట్టింపు ఉత్సాహంతో తిరిగి పుంజుకుని విజయాలు సాధించాం" అని సీఎం ధీమా వ్యక్తం చేశారు.

ఎమ్మెల్సీ ఎన్నికల్లో విజయమే లక్ష్యం:

రాష్ట్రంలోని 6 ఉమ్మడి జిల్లాల్లో ఎమ్మెల్సీ ఎన్నికలు జరగనున్న నేపథ్యంలో పార్టీ నేతలు, కార్యకర్తలు పూర్తిస్థాయిలో అప్రమత్తంగా ఉండాలని సీఎం ఆదేశించారు. క్షేత్రస్థాయి సమన్వయం పెంచుకుని కాంగ్రెస్ అభ్యర్థుల విజయానికి ప్రతి ఒక్కరూ కష్టపడి పనిచేయాలని పిలుపునిచ్చారు.